(បរទេស)៖ គ្រូបង្វឹកក្រុមស្រ្តីអ៉ីតាលី លោក Andrea Soncin បានបង្ហាញនៅការជឿជាក់ខ្លាំងលើកូនក្រុម នឹងអាចយកឈ្នះក្រុមស្ត្រីអង់គ្លេស ដែលជាម្ចាស់ពាននារីអឺរ៉ុប Women’s Euro កាលពី ៤ឆ្នាំមុន នៅវគ្គពាក់កណ្តាលផ្តាច់ព្រ័ត្រ Euro 2025 ដែលនឹងត្រូវប៉ះគ្នានារាត្រីម៉ោង ២:០០យប់នេះ (ម៉ោងនៅកម្ពុជា) ដែលមានប្រទេសស្វីស ធ្វើជាម្ចាស់ផ្ទះការប្រកួត ជំនាន់ទី១៤ នេះ ។

មុនការឈានមកដល់វគ្គ ៤ក្រុមចុងក្រោយត្រូវជួបនារីតោកំណាចអង់គ្លេស ក្រុមនារីអ៉ីតាលី បានឆ្លងកាត់វគ្គចែកពូលនាមជាក្រុមឈរលេខ២ នៃពូល B ហើយបន្តយកឈ្នះក្រុមនារីន័រវេល នៅវគ្គ ៨ក្រុម ក្លាយជាការឈានមកដល់វគ្គ ៤ក្រុមចុងក្រោយលើកដំបូងរបស់ពួកគេគិតចាប់តាំងពីឆ្នាំ១៩៩៧ ។

លោក Andrea Soncin បង្ហាញថា នេះជាក្តីសុបិនដ៏ធំរបស់ពួកគេក្នុងការប្រកួតប្រជែងនាពេលនេះហើយក្រុមមានទំនុកចិត្តថា ពួកគេអាចយកឈ្នះក្រុមរបស់លោកស្រី Sarina Wiegman នឹងឈានទៅបង្ហាញខ្លួនជាលើកដំបូងនៅក្នុងវគ្គផ្តាច់ព្រ័ត្រដណ្តើមពាននារីអឺរ៉ុបនេះ ជាថ្មីម្តងទៀត ។

លោក Soncin បានឱ្យដឹងក្នុងសន្និសីទសារព័ត៌មានកាលពីថ្ងៃចន្ទថា «ពួកយើងធ្វើបានយ៉ាងល្អនៅក្នុងព្រឹត្តិការណ៍នេះ ជាមួយមានភាពក្លាហាន យើងជឿជាក់ថា យើងនឹងយកឈ្នះការប្រកួត ហើយយើងពិតជាមានការទទួលស្គាល់ចំពោះគុណភាពរបស់កីឡានារីអង់គ្លេស ជាក្រុមមានបទពិសោធន៍ច្រើននៅការប្រកួតកម្រិតអន្តរជាតិរបស់ពួកគេ» ។

សូមជម្រាបផងថា ក្រុមស្ត្រីអ៉ីតាលី ក៏ធ្លាប់ឈានដល់វគ្គផ្តាច់ព្រ័ត្រកាលឆ្នាំ១៩៩៣ នាមជាម្ចាស់ការប្រកួត និងនៅឆ្នាំ១៩៩៧ តែបានត្រឹមជើងឯករងប៉ុណ្ណោះ ។​ ខណៈក្រុមនារីអង់គ្លេស ជាម្ចាស់ពាននេះមួយលើក ក្រោយផ្តួលក្រុមនារីអាល្លឺម៉ង់ កាលឆ្នាំ២០២២ ៕