(ឡុងដ៏)៖ ក្រុមហង្សក្រហម Liverpool ពេលនេះមានការព្រមព្រៀងមួយ នឹងចំណាយរហូតដល់ប្រមាណ ៧៩លានផោន ដើម្បីទិញបានខ្សែប្រយុទ្ធចំណូលថ្មី Hugo Ekitike ពីក្លិបអាល្លឺម៉ង់ Eintracht Frankfurt ដ្បិតត្រូវចំណាយតម្លៃដើម ៦៩លានផោនដំបូង ដើម្បីយកបានជម្រើសកីឡាករជួរមុខបន្ថែមនៅការប្រកួតប្រជែងពានរដូវកាលថ្មី ។

កីឡាករសញ្ជាតិបារាំងអាយុ ២៣ឆ្នាំរូបនេះត្រូវបានជឿជាក់ថា នឹងទៅដល់ចក្រភពអង់គ្លេស នៅថ្ងៃអង្គារនេះ មុនពេលធ្វើការពិនិត្យសុខភាព ខណៈក្លិប Frankfurt ក៏បានទទួលយកកិច្ចព្រមព្រៀងដែលមានតម្លៃដល់ ៧៩លានផោន ជាមួយនឹងការធានាទទួលបានប្រាក់ដើម ៦៩លានផោន និងបូកបន្ថែម ១០លានផោនបន្តទៀត ។

ជាមួយគ្នានេះ Ekitike ត្រូវបានគេរំពឹងថា នឹងអាចចុះហត្ថលេខាលើកិច្ចសន្យារយៈពេល ៦ឆ្នាំជាមួយ Liverpool នឹងអាចចូលរួមដំណើរជាមួយក្រុមថ្មី លក្ខខណៈទេសចរណ៍មកកាន់ទឹកដីអាស៊ីនៅចុងសប្តាហ៍នេះ ហើយការទៅដល់របស់រូបគេ នឹងជំរុញការចំណាយរបស់ Liverpool ឈានដល់ ២៥០លានផោនក្នុងទីផ្សារដោះដូររដូវក្តៅនេះ ៕