(ភ្នំពេញ)៖ ក្រុមកីឡាបញ្ចស៊ីឡាត់ជម្រើសជាតិកម្ពុជា បាននឹងកំពុងប្រមូលផ្ដុំហ្វឹកហាត់យ៉ាងយកចិត្តទុកដាក់នៅពហុកីឡដ្ឋានជាតិមរតកតេជោ និងត្រៀមខ្លួនរួចរាល់ ដើម្បីបង្ហាញខ្លួនជាលើកទី២ ក្នុងព្រឹត្តិការណ៍ស៊ីហ្គេម លើកទី៣៣ នៅថៃ នាចុងឆ្នាំ២០២៥ បន្ទាប់ពីការបង្ហាញខ្លួនលើកដំបូង ដណ្ដើមបានមេដាយ ១២គ្រឿង ក្នុងនាមម្ចាស់ផ្ទះស៊ីហ្គេម ឆ្នាំ២០២៣ កន្លងទៅ។

លោក ឌឹប ង៉ែត គ្រូជំនួយក្រុមជម្រើសជាតិកម្ពុជា បានបញ្ជាក់ថា រយៈពេល ៤ខែមកហើយ ដែលក្រុមបញ្ចស៊ីឡាត់កម្ពុជាបានប្រមូលផ្ដុំហ្វឹកហាត់ពេញលេញ ដើម្បីត្រៀមការប្រកួតអន្ដរជាតិនានា ពិសេសស៊ីហ្គេមចុងឆ្នាំនេះ។ ក្រោយពីមានបទពិសោធន៍ស៊ីហ្គេមលើកដំបូងនៅកម្ពុជា ក្រុមកីឡាករ-កីឡាការិនី បានយល់ដឹងកាន់តែច្បាស់ពីបច្ចេកទេស ទាំងការវាយយកពិន្ទុ និងការបោកជាដើម។

ដោយមានការជំរុញ និងយកចិត្តទុកដាក់របស់ថ្នាក់ដឹកនាំសហព័ន្ធ ក៏ដូចជាការខិតខំប្រឹងប្រែងរបស់កីឡាករ-កីឡាការិនី បានជំរុញការហ្វឹកហាត់មានភាពរីកចម្រើនគួរឲ្យកត់សម្គាល់ ទោះបីបញ្ចស៊ីឡាត់មិនមែនជាប្រភេទកីឡាប្រពៃណីជាតិក្ដី ។ យ៉ាងណាមុនឈានដល់ការប្រកួតស៊ីហ្គេមនៅថៃ សហព័ន្ធក៏គ្រោងនឹងចូលរួមការប្រកួតអន្ដរជាតិមួយ ដើម្បីវាស់ស្ទង់ និងពង្រឹងសមត្ថភាពបច្ចេកទេសកីឡាករ-កីឡាការិនីកម្ពុជាបន្ថែមផងដែរ។

គ្រូជំនួយដដែលបន្ថែមទៀតថា សម្រាប់ការប្រកួតកីឡាស៊ីហ្គេម ក្រៅពីឥណ្ឌូនេស៊ី ដែលជាម្ចាស់ក្បាច់គុន ក៏មានបណ្ដាប្រទេសមួយចំនួន មានសមត្ថភាពប្រកួតប្រជែងខ្ពស់ផងដែរ ដ្បិតពួកគេបានហ្វឹកហាត់មុនកម្ពុជា ដូចជាវៀតណាម និងថៃ ជាដើម ។ ប៉ុន្ដែយ៉ាងណាលោកជឿជាក់លើការខំប្រឹងរបស់កូនក្រុម ដែលកំពុងហ្វឹកហាត់ និងសម្រួចសមត្ថភាព ដើម្បីបង្ហាញខ្លួនក្នុងស៊ីហ្គេមជាថ្មី ហើយក៏សង្ឃឹមនឹងទទួលបានលទ្ធផលកាន់តែល្អប្រសើរទៀតផង។

សូមរំឮកថា ក្រោយបង្កើតឲ្យមានកីឡាបញ្ចស៊ីឡាត់នៅកម្ពុជា កាលពីចុងឆ្នាំ២០២២ ហើយបានបោះជំរំហ្វឹកហាត់រយៈពេល ៦ខែ នៅឥណ្ឌូនេស៊ី ក្រុមបញ្ចស៊ីឡាត់កម្ពុជា បានចូលរួមប្រកួតលើកដំបូង ក្នុងព្រឹត្តិការណ៍ស៊ីហ្គេម ឆ្នាំ២០២៣ ដោយដណ្ដើមបានមេដាយសរុប ១២គ្រឿង (មាស ២ និងសំរឹទ្ធ ១០) ។ បន្ទាប់មកសហព័ន្ធក៏បានបញ្ជូនកីឡាករ-កីឡាការិនីរបស់ខ្លួនចូលរួមព្រឹត្តិការណ៍អន្ដរជាតិនានា និងទទួលបានមេដាយជាបន្ដបន្ទាប់ផងដែរ៕