(បរទេស)៖ ក្រុមហ៊ុនបច្ចេកវិទ្យាយក្ស Amazon បានបញ្ជាក់ពីគម្រោងទិញយកក្រុមហ៊ុនបច្ចេកវិទ្យាថ្មីមួយដែលមានឈ្មោះ «Bee AI» ដែលជាក្រុមហ៊ុនផលិតខ្សែដៃឆ្លាតវៃបំពាក់ដោយបច្ចេកវិទ្យាបញ្ញាសិប្បនិម្មិត (AI)។ ឧបករណ៍នេះមើលទៅស្រដៀងនឹងនាឡិកា Fitbit ខណៈវាអាចស្តាប់ និងវិភាគការសន្ទនាដើម្បីផ្តល់ជាសេចក្ដីសង្ខេប បញ្ជីការងារ (to-do lists) និងការរំលឹកផ្សេងៗ។ នេះបើយោងតាមការចេញផ្សាយដោយ CNBC នៅថ្ងៃទី២២ ខែកក្កដា ឆ្នាំ២០២៥។

លោកស្រី Maria de Lourdes Zollo ដែលជានាយកប្រតិបត្តិ (CEO) នៃក្រុមហ៊ុន Bee បានប្រកាសនៅលើ LinkedIn ថា ក្រុមហ៊ុនរបស់លោកស្រីនឹងចូលរួមជាមួយ Amazon។ ការទិញយកនេះជាផ្នែកមួយនៃកិច្ចខិតខំប្រឹងប្រែងរបស់ Amazon ក្នុងការជំរុញបច្ចេកវិទ្យា AI ដែលបានដាក់ចេញនូវផលិតផលជាច្រើនរួចមកហើយ ដូចជាម៉ូដែល Nova, ឈីប Trainium, និងការកែលម្អជំនួយការសំឡេង Alexa។

គួរជម្រាបថា ការទិញយកនេះបង្ហាញពីការវិនិយោគយ៉ាងខ្លាំងរបស់ក្រុមហ៊ុនបច្ចេកវិទ្យាយក្សលើ AI ដែលជាបច្ចេកវិទ្យាកំពុងរីកចម្រើនយ៉ាងឆាប់រហ័ស។ ក្រុមហ៊ុនបច្ចេកវិទ្យាផ្សេងទៀតក៏បានដាក់ចេញនូវឧបករណ៍ AI ស្រដៀងគ្នានេះដែរ ដូចជា Rabbit R1, AI pin របស់ Humane និងវ៉ែនតាឆ្លាតវៃ Ray-Ban របស់ Meta។ ថ្មីៗនេះ OpenAI ក៏បានទិញយកក្រុមហ៊ុន Startup ផលិតឧបករណ៍ AI របស់លោក Jony Ive ឈ្មោះ io ក្នុងតម្លៃប្រហែល ៦,៤ ពាន់លានដុល្លារផងដែរ...៕