(បរទេស)៖ ក្រុមជើងឯកលីគអង់គ្លេស Liverpool បានឈានដល់ការចុះកិច្ចសន្យាទិញខ្សែប្រយុទ្ធជួរមុខ Hugo Ekitike ពីក្លិប Eintracht Frankfurt ជាផ្លូវការហើយ ក្នុងតម្លៃបឋម ៦៩លានផោន ជាមួយនឹងតម្លៃបន្ថែម ១០លានផោនផ្សេងទៀត កាលពីដើមសប្តាហ៍នេះ។

ពីគេហទំព័រកីឡា BBC បានចេញផ្សាយថា ហង្សក្រហម Liverpool បានចំណាយអស់ ២៥០លានផោនហើយ ដើម្បីទិញកីឡាករថ្មីរដូវកាលនេះ។

ពួកគេទិញបានខ្សែប្រយុទ្ធ Florian Wirtz ក្នុងតម្លៃបំបែកកំណត់ត្រានៅអង់គ្លេស ១១៦លានផោន និងខ្សែការពារ Milos Kerkez រួមទាំង Jeremie Frimpong បូកបញ្ចូលគ្នាអស់ ៧០លានផោន។

សមាជិកថ្មីវ័យ ២៣ឆ្នាំ Etiteke នឹងរួមដំណើរជាមួយ Liverpool ម្ចាស់ជើងឯកពាន Premier League រដូវកាល ២០២៤-២៥ ក្នុងដំណើរឆ្ពោះទៅប្រកួតកំដៅសាច់ដុំនៅតំបន់អាស៊ីនាសប្តាហ៍ក្រោយ បន្ទាប់ពីពិនិត្យសុខភាព និងព្រមព្រៀងលើលក្ខខណ្ឌផ្ទាល់ខ្លួនរួចមក។

កីឡាករអន្តរបារាំងរូបនេះរកបាន ១៥គ្រាប់ និងបញ្ជូនបាន ៨គ្រាប់ផងដែរ បានរួមចំណែកជួយ Frankfurt បញ្ចប់ក្នុងចំណាត់ថ្នាក់លេខ៣ នៅ Bundesliga រដូវកាលមុន ដោយទទួលបានកៅអីស្វ័យប្រវត្តិលេងវគ្គចែកពូល UEFA Chmapions League 2025-26 ថែមទៀតផង៕