(បរទេស)៖ ប្រទេសចិនបានប្រកាសហាមឃាត់ជាផ្លូវការ ទៅលើការប្រើប្រាស់វេទិកាបណ្តាញសង្គម «OnlyFans» ដែលមានមូលដ្ឋាននៅចក្រភពអង់គ្លេស និងបានហៅកម្មវិធីនេះថាជា «ជំងឺសាធារណៈរបស់ខាងលិច» ដែលនាំឲ្យប៉ះពាល់ដល់គុណតម្លៃប្រពៃណី និងសាមគ្គីភាពសង្គម។

ទោះបីជា OnlyFans មិនធ្លាប់មាននៅចិនជាផ្លូវការក៏ដោយ ក៏មានអ្នកប្រើជាច្រើនដែលបានចូលប្រើតាមរយៈ VPN និងប្រព័ន្ធបង់ប្រាក់តាមភាគីទីបី ដែលវិធីសាស្ត្រនេះអាជ្ញាធរនឹងបិទទាំងស្រុងចាប់ពីពេលនេះ។ ការហាមប្រាមនេះ គឺជាផ្នែកមួយនៃការចាក់សោសម្រាប់វេទិកាឌីជីថលបរទេស ដែលកំពុងត្រូវបានបង្កើនសម្ពាធយ៉ាងខ្លាំងពីរដ្ឋាភិបាលចិន។ OnlyFans ត្រូវបានរាប់បញ្ចូលក្នុងបញ្ជីវេទិកាដែលត្រូវហាមការប្រើប្រាស់រួចមកហើយ ដូចជា Instagram, Reddit និង Twitch។

មន្ត្រីរដ្ឋាភិបាលបានអះអាងថា វេទិកាទាំងនេះបានលើកកម្ពស់នូវទស្សនៈវិស័យនិងទស្សនវិជ្ជាលោកខាងលិច ដែលផ្ទុយនឹង «គុណតម្លៃសង្គមស្នូល» របស់ចិន។ ទោះជាយ៉ាងណា ក្រុមយុវជនដែលចេះបច្ចេកវិទ្យានៅតែបន្តស្វែងរកមធ្យោបាយ ដើម្បីចូលប្រើវេទិកាអន្តរជាតិជាបន្តបន្ទាប់៕