(បរទេស)៖ ថ្មីៗនេះ តុលាការសហព័ន្ធនៅរដ្ឋតិចសាស់ បានបង្គាប់ឱ្យក្រុមហ៊ុនទូរគមនាគមន៍អាមេរិក Verizon Wireless បង់សំណងចំនួន ១៧៥ លានដុល្លារ សម្រាប់ការរំលោភលើប៉ាតង់បច្ចេកវិទ្យាទំនាក់ទំនងឥតខ្សែរបស់ក្រុមហ៊ុន Headwater Research។ នេះបើយោងតាមការចេញផ្សាយរបស់ទីភ្នាក់ងារព័ត៌មាន Reuters នៅថ្ងៃទី២៤ ខែកក្កដា ឆ្នាំ២០២៥។

សេចក្តីសម្រេចនេះបានធ្វើឡើងប៉ុន្មានខែប៉ុណ្ណោះ បន្ទាប់ពីក្រុមហ៊ុន Headwater ទទួលបានជ័យជម្នះក្នុងសំណុំរឿងស្រដៀងគ្នាប្រឆាំងនឹងក្រុមហ៊ុន Samsung ដែលមានទឹកប្រាក់រហូតដល់ ២៧៨ លានដុល្លារ។ ទាក់ទងនឹងរឿងនេះ អ្នកនាំពាក្យរបស់ក្រុមហ៊ុន Verizon និងមេធាវីរបស់ Headwater មិនទាន់បានឆ្លើយតបភ្លាមៗចំពោះសាលក្រមនោះទេ។

ក្រុមហ៊ុន Headwater Research ដែលបង្កើតឡើងដោយអ្នកវិទ្យាសាស្ត្រ Gregory Raleigh បានអះអាងក្នុងពាក្យបណ្តឹងឆ្នាំ ២០២៣ ថា ខ្លួនបានចែករំលែកបច្ចេកវិទ្យាទៅឱ្យក្រុមហ៊ុន Verizon ក្រោមកិច្ចព្រមព្រៀងមិនបង្ហាញព័ត៌មាន (NDA) ចន្លោះឆ្នាំ ២០០៩ ដល់ ២០១១។ បច្ចេកវិទ្យានេះជួយកាត់បន្ថយការប្រើប្រាស់ទិន្នន័យ ជួយពន្យារអាយុកាលថ្ម និងកាត់បន្ថយការកកស្ទះបណ្តាញ។ ប៉ុន្តែក្រុមហ៊ុន Verizon បែរជារំលោភលើប៉ាតង់របស់ខ្លួនទៅវិញ ដោយប្រើប្រាស់បច្ចេកវិទ្យានេះលើទូរសព្ទចល័ត ថេប្លេត និងបណ្តាញកោសិកា។ ទោះជាយ៉ាងនេះក្តី ក្រុមហ៊ុន Verizon បានបដិសេធរាល់ការចោទប្រកាន់ទាំងអស់នេះ ដោយអះអាងថា ប៉ាតង់របស់ Headwater មិនមានសុពលភាពទេ៕