Arsenal ទិញបាន Mosquera ដែលជាខ្សែការពារល្អដាច់គេនៅអឺរ៉ុប ពីក្លិប Valencia
25-07-2025 09:44
(ឡុងដ៍)៖ ក្រុមកាំភ្លើងធំ Arsenal បានចុះកិច្ចសន្យាជាមួយកីឡាករ Cristhian Mosquera ដែលជាខ្សែការពារវ័យក្មេងលេងល្អដាច់គេប្រចាំតំបន់អឺរ៉ុប ពីក្លិបអេស្ប៉ាញ Valencia ក្នុងតម្លៃប្រមាណ ១៣លានផោន។ នេះបើយោងតាមការចេញផ្សាយដោយ BBC។

កីឡាករអន្តរជាតិអេស្ប៉ាញ វ័យ ២១ឆ្នាំរូបនេះ បានព្រមព្រៀមចុះកិច្ចសន្យានៅ Emirates រយៈពេល ៥ឆ្នាំ ជាមួយនឹងជម្រើសថែមបាន ១២ខែទៀតដែរ ក្នុងនាមខ្សែការពារដែលអាចលេងបាន ២តំបន់រួមមាន កណ្តាល និងស្លាបស្តាំ ដើម្បីជំនួសកន្លែងរបស់ Takehiro Tomiyasu ដែលចាកចេញកាលពីដើមខែកក្កដានេះ។
Mosquera កំពុងស្ថិតក្នុងឈុតយុវជនអាយុក្រោម ២១ឆ្នាំអេស្ប៉ាញបច្ចុប្បន្ន ដែលបានចូលរួមជាមួយ Valencia លេងនៅក្របខណ្ឌ La Liga កាលឆ្នាំ២០១៦ នៅពេលរូបគេមានវ័យទើបតែ ១២ឆ្នាំ មុនពេលត្រូវបានកោះហៅមកលេងក្នុងក្រុមធំនាអំឡុងឆ្នាំ២០២២ និងបានក្លាយជាខ្សែការពារកណ្តាលក្មេងជាងគេប្រចាំក្លិបទៀតផង។
រូបគេបានបង្ហាញខ្លួនសរុប ៩០លើកជាមួយ Valencia និងបានចូលលេងយ៉ាងទៀតទាត់នារដូវកាលមុន ពោលគឺ ៣៧លើក ក្នុងចំណោម ៣៨ប្រកួតសរុប គ្រាដែល Valencia ជាប់ចំណាត់ថ្នាក់លេខរៀងទី១២ ក្នុងលីគអេស្ប៉ាញ។
Mosquera បានក្លាយជាសមាជិកថ្មីទី៥ នៃក្រុមរបស់គ្រូបង្វឹកសញ្ជាតិអេស្ប៉ាញ Mikel Arteta ក្រោយការមកដល់របស់ Martin Zubimendi, Kepa Arrizabalaga, Christian Norgaard និង Noni Madueke៕