(បរទេស)៖ ម្ចាស់ជើងឯកខ្សែក្រវាត់ទម្ងន់ធ្ងន់ពិភពលោក វ៉ៃមិនទាន់ចាញ់ Oleksandr Usyk ត្រូវបានស្ថាប័នខ្សែក្រវាត់ WBO តម្រូវឱ្យចរចាវាយទល់នឹង Joseph Parker សញ្ជាតិណូវែលហ្សេឡង់ជាបន្តទៀត។ នេះបើយោងតាមការចេញផ្សាយដោយ BBC។

កីឡាករអន្តរជាតិអ៊ុយក្រែន វ័យ ៣៨ឆ្នាំ បន្តផ្តួល Daniel Dubois បានសម្រេចជាលើកទី២ កាលពីថ្ងៃទី១៩ ខែកក្កដា ឆ្នាំ២០២៥ ត្រឹមទឹកទី៥ ប៉ុណ្ណោះនៅឯសង្វៀនដែលស្ថិតក្នុងកីឡដ្ឋាន Wembley ប្រទេសអង់គ្លេស។

បច្ចុប្បន្ននេះ Parker វ័យ ៣៣ឆ្នាំ បានកំពុងគ្រប់គ្រងខ្សែក្រវាត់ WBO ជាបណ្តោះអាសន្នផងដែរ ក្រោយយកឈ្នះ Zhilei Zhang នាអំឡុងខែមីនា ឆ្នាំ២០២៤។

គូភាគីទាំងពីរមានរយៈពេល ៣០ឆ្នាំ ដើម្បីស្វែងរកកិច្ចព្រមព្រៀង ឬក៏ WBO ជាអ្នករៀបចំនៃជំនួបធំនេះតែម្តង។

ទោះជាយ៉ាងណាសម្រាប់ Usyk វិញបានថ្លែងថា «រូបលោកចង់សម្រាកពី ២ទៅ៣ខែ» បន្ទាប់ពីយកឈ្នះកីឡាករអង់គ្លេស Dubios ជាលើកទី២ រួចមក ក៏ប៉ុន្តែ Parker, Tyson Fury, Anthony Joshua និង Darek Chrisora គឺជាគូប្រកួតបន្ទាប់របស់លោក។

Usyk មិនទាន់ចាញ់ការប្រកួតណាមួយឡើយ ក្នុងចំណោមឡើងសង្វៀនលក្ខណៈអាជីពបាន ២៤លើក ក្នុងនោះដែរមាន ១៥លើក ផ្តួលដៃគូឱ្យបោះបង់ការប្រកួតទៀតផង៕