(បរទេស)៖ សារព័ត៌មាន Bloomberg News បានរាយការណ៍មកថាក្រុមហ៊ុន Neuralink ដែលជាក្រុមហ៊ុនបច្ចេកវិទ្យាដាំបន្ទះឈីបក្នុងខួរក្បាលរបស់លោក Elon Musk មានគោលដៅរកចំណូលប្រចាំឆ្នាំយ៉ាងតិច ១ពាន់លានដុល្លារនៅត្រឹមឆ្នាំ២០៣១ ហើយគ្រោងនឹងធ្វើការវះកាត់ដាំបន្ទះឈីបលើមនុស្សចំនួន ២០,០០០នាក់ក្នុងមួយឆ្នាំ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី២៤ ខែកក្កដា ឆ្នាំ២០២៥។

របាយការណ៍ដដែលបានបន្តថា ក្រុមហ៊ុនមានបំណងបើកដំណើរការគ្លីនិកធំៗចំនួន ៥ ក្នុងរយៈពេល ៦ឆ្នាំខាងមុខ និងផ្តល់ជូននូវឧបករណ៍ដាំបន្ទះឈីបក្នុងខួរក្បាលចំនួន ៣ប្រភេទ រួមមាន៖ Telepathy សម្រាប់ទំនាក់ទំនងរវាងខួរក្បាល និងម៉ាស៊ីន, Blindsight សម្រាប់ស្ដារការមើលឃើញឡើងវិញ និង Deep សម្រាប់ព្យាបាលអាការៈញ័រដៃជើង និងជំងឺផាកឃីនសុន (Parkinson's disease)។

ក្រុមហ៊ុនរំពឹងថានឹងទទួលបានការអនុម័តពីស្ថាប័ននិយតករសម្រាប់ឧបករណ៍ Telepathy នៅត្រឹមឆ្នាំ២០២៩ ជាមួយនឹងផែនការអនុវត្តការវះកាត់ចំនួន ២,០០០ករណីក្នុងមួយឆ្នាំ និងរកចំណូលបាន ១០០លានដុល្លារ។ ត្រឹមឆ្នាំ២០៣០ ក្រុមហ៊ុន Neuralink រំពឹងថានឹងដាក់បង្ហាញ Blindsight ដោយពង្រីកការវះកាត់ដល់ ១០,០០០ករណីក្នុងមួយឆ្នាំ និងរកចំណូលបានជាង ៥០០លានដុល្លារ។

របាយការណ៍ពី Bloomberg ក៏បានឲ្យដឹងផងដែរថា ក្រុមហ៊ុន Neuralink ដែលត្រូវបានបង្កើតឡើងក្នុងឆ្នាំ២០១៦ មកទល់ពេលនេះបានកៀរគរថវិកាពីអ្នកវិនិយោគប្រហែល ១.៣ពាន់លានដុល្លារ ហើយមានតម្លៃប្រហែល ៩ពាន់លានដុល្លារ ដោយយោងលើទិន្នន័យរបស់ PitchBook។ កាលពីខែឧសភាកន្លងទៅ ក្រុមហ៊ុនបានទទួលស្លាកសញ្ញា «breakthrough» ពីស្ថាប័នរដ្ឋបាលចំណីអាហារ និងឱសថអាមេរិក (FDA) សម្រាប់ឧបករណ៍ស្ដារការនិយាយ ហើយកាលពីឆ្នាំមុន ឧបករណ៍ស្ដារការមើលឃើញរបស់ខ្លួនក៏បានទទួលស្លាកសញ្ញាដូចគ្នានេះដែរ។

គួរជម្រាបថា បច្ចុប្បន្ន ក្រុមហ៊ុនកំពុងបន្តការសាកល្បងលើមនុស្សបន្ទាប់ពីបានដោះស្រាយក្ដីបារម្ភអំពីសុវត្ថិភាពដែល FDA បានលើកឡើងកាលពីឆ្នាំ២០២២។ យោងតាម Neuralink អ្នកជំងឺចំនួន ៥នាក់ដែលមានបញ្ហាខ្វិនធ្ងន់ធ្ងរ កំពុងប្រើប្រាស់ឧបករណ៍របស់ក្រុមហ៊ុនដើម្បីបញ្ជាឧបករណ៍ឌីជីថល ដោយប្រើប្រាស់តែគំនិតរបស់ពួកគេ៕