(កូឡាឡាំពួរ)៖ ស៊ីអាយអិមប៊ី គ្រុប (CIMB Group) ដែលជាធនាគារឈានមុខមួយ នៅតំបន់អាស៊ាន នឹងវិនិយោគបន្ថែម លើផ្នែកឌីជីថល នៅកម្ពុជា។ នេះបើតាមលោក Novan Amirudin ប្រធាននាយកប្រតិបត្តិរបស់ CIMB Group ដែលថ្លែងនៅថ្ងៃទី២១ ខែកក្កដា ឆ្នាំ២០២៥ ក្នុងវេទិកាសារព័ត៌មាន នៅទីស្នាក់ការកណ្តាលរបស់ CIMB Group ក្នុងទីក្រុងកូឡាឡាំពួរ។

CIMB Group គឺជាធនាគារធំលំដាប់លេខ៥ នៅអាស៊ាន បើគិតលើទ្រព្យសកម្ម ជាមួយនឹងបណ្តាញសាខាដ៏ទូលំទូលាយចំនួន ៥៩២ទីតាំង ក្នុងតំបន់ បុគ្គលិកជាង​ ៣៣.០០០នាក់ និងអតិថិជនប្រហែល ២៨លាននាក់។ ក្នុងនាមជាក្រុមហ៊ុនបុត្រសម្ព័ន្ធមួយរបស់ CIMB Group ធនាគារ ស៊ីអាយអិមប៊ី ភីអិលស៊ី (ធនាគារ CIMB) បានចាប់ផ្តើមដំណើរការ ក្នុងប្រទេសកម្ពុជា នៅឆ្នាំ២០១០ ដោយបានពង្រីកខ្លួនចំនួន ១៤សាខា។

ធនាគារ CIMB បានដាក់ឱ្យប្រើប្រាស់កម្មវិធីធនាគារចល័ត CIMB Mobile ដល់អតិថិជន ចាប់តាំងពីឆ្នាំ២០២២មកម្ល៉េះ។ មិនតែប៉ុណ្ណោះ ធនាគារថែមទាំងបាននាំយក OctoBiz Lite ដែលជាកម្មវិធីធនាគារចល័ត សម្រាប់អតិថិជន និងម្ចាស់អាជីវកម្ម ផ្នែកសហគ្រាសធុនតូច និងមធ្យម (SME) ក្នុងប្រទេសកម្ពុជាផងដែរ។

លោក Novan Amirudin បានបញ្ជាក់យ៉ាងដូច្នេះ «យើងទើបតែបានកែលម្អកម្មវិធីធនាគារថ្មី សម្រាប់អតិថិជនបុគ្គល ក្នុងប្រទេសកម្ពុជា។ ខ្ញុំបានពិនិត្យមើលតួលេខ ហើយឃើញថា មានការកើនឡើងគួរឱ្យកត់សម្គាល់ នៃចំនួនអតិថិជន ដែលកំពុងប្រើប្រាស់កម្មវិធីនេះ។ យើងនឹងនាំយកកម្មវិធីធនាគារស្រដៀងគ្នានេះមួយទៀត គឺ OCTO Biz សម្រាប់អតិថិជនជាលក្ខណៈក្រុមហ៊ុន ដែលនឹងសម្ពោធជាផ្លូវការ ក្នុងឆ្នាំ២០២៦»។

ជាមួយគ្នានេះ លោក ហុង ជៀប ប្រធាននាយកប្រតិបត្តិ នៃធនាគារ CIMB បានថ្លែងថា យុទ្ធសាស្ត្ររបស់ធនាគារ CIMB គឺផ្អែកលើគុណតម្លៃធុរកិច្ចរបស់ធនាគារ ដោយចាប់យកផ្នែកឌីជីថល ធ្វើជាចលករ​ ដើម្បីជំរុញអាជីវកម្មរបស់ធនាគារ បានលឿន និងមានស្ថិរភាព។

លោកបានបញ្ជាក់យ៉ាងដូច្នេះ «យើងនឹងវិនិយោគច្រើនលើផ្នែកឌីជីថល ដោយសារគ្នាយើង លែងសូវទៅសាខា យើងលែងសូវកាន់កាបូបលុយទៀត យើងកាន់តែទូរសព្ទ។ អីចឹងយើងនឹងវិនិយោគច្រើន លើឌីជីថល។ ថ្មីៗនេះ យើងបានសម្ពោធ OctoBiz Lite។ យើងកំពុងប្រតិបត្តិការគម្រោងឌីជីថលមួយចំនួនទៀត ដែលនឹងចេញបណ្តើរៗ ក្នុងឆ្នាំនេះ និងឆ្នាំក្រោយ»។

សូមជម្រាបជូនថា ធនាគារ CIMB បានឈរជើងយ៉ាងរឹងមាំ នៅកម្ពុជា អស់រយៈពេល ១៥ឆ្នាំមកហើយ ដែលជាតួអង្គសំខាន់ ក្នុងវិស័យហិរញ្ញវត្ថុកម្ពុជា។ ជាពិសេស ឥណទានមិនដំណើរការ (NPL) របស់ធនាគារ CIMB មានកម្រិតទាប ក្នុងអត្រាត្រឹម ២.៣៩% តែប៉ុណ្ណោះ ដែលឆ្លុះបញ្ចាំងការយកចិត្តទុកដាក់ខ្ពស់របស់ធនាគារ ចំពោះយុទ្ធសាស្ត្របញ្ចេញឥណទានដ៏រឹងមាំ ព្រមទាំងការគ្រប់គ្រងហានិភ័យដ៏មានប្រសិទ្ធភាព។

មកដល់ពេលនេះ ធនាគារ CIMB ធ្លាប់បានឈ្នះពានរង្វាន់ជាច្រើន រួមមានពានរង្វាន់ «ធនាគារអន្តរជាតិល្អបំផុត នៅកម្ពុជា» ផ្តល់ដោយ Asiamoney ក្នុងឆ្នាំ២០១៨ និងឆ្នាំ២០១៩ និងពានរង្វាន់ «ទីកន្លែងការងារល្អបំផុត នៅកម្ពុជា» ផ្តល់ដោយ HR Asia ក្នុងឆ្នាំ២០២០ និងឆ្នាំ២០២៤។ សម្រាប់កម្មវិធីទំនួលខុសត្រូវសង្គម ធនាគារ CIMB បានចូលរួមសកម្មភាពសប្បុរសធម៌ជាច្រើន ដែលសរុបជាទឹកប្រាក់ រហូតដល់ជាង ៦៣ម៉ឺនដុល្លារអាមេរិក ទៅលើវិស័យសំខាន់ៗ ដូចជាវិស័យអប់រំ សុខាភិបាល សង្គមកិច្ច និងបរិស្ថានជាដើម៕