(ភ្នំពេញ)៖ លោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា បានសម្ដែងការគាំទ្រពេញទំហឹង ចំពោះកិច្ចសហការបង្កើតវិទ្យាស្ថានបណ្ដុះបណ្ដាលគុនខ្មែរនៅកម្ពុជា ហើយសង្ឃឹមយ៉ាងមុតមាំថា វិទ្យាស្ថាននេះ នឹងក្លាយជាកន្លែងបណ្ដុះបណ្ដាលនូវជនបង្គោល សម្រាប់ពង្រីកការផ្សព្វផ្សាយ និងអភិវឌ្ឍន៍គុនខ្មែរកាន់តែរីកចម្រើនលើឆាកអន្ដរជាតិ។

ការបង្ហាញសុទិដ្ឋិនិយមនេះ បន្ទាប់ពីក្រសួងអប់រំ យុវជន និងកីឡា បានធ្វើការចុះអនុស្សារណៈយោគយល់គ្នា(MOU) ជាមួយក្រុមហ៊ុនខេមបូឌាន នូនហ្វីអឺមូល សេង ឯ.ក ក្នុងកិច្ចសហការណ៍គាំទ្រវិទ្យាស្ថានបណ្តុះបណ្តាគុនខ្មែរ នៅកម្ពុជា កាលពីល្ងាចថ្ងៃទី២៤ ខែកក្កដាកន្លងទៅ នៅទីស្នាក់ការគណៈកម្មាធិការជាតិអូឡាំពិកកម្ពុជា ក្នុងនោះក៏មានការចូលរួមពីលោក ខូវ ឆាយ ប្រធានសហព័ន្ធកីឡាប្រដាល់គុនខ្មែរ និងជាអគ្គលេខាធិការសហព័ន្ធគុនខ្មែរអន្ដរជាតិផងដែរ។

មន្ដ្រីជាន់ខ្ពស់ក្រសួងអប់រំខាងលើ បានបង្ហាញខ្លឹមសារសំខាន់ៗ នៃការចុះ MOU ខាងលើ ដែលអាចកំណត់បានជារបតថ្មី និងជាកំណត់ត្រាប្រវត្តិសាស្រ្តមួយសម្រាប់គុនខ្មែរ ដើម្បីពង្រីកការផ្សព្វផ្សាយគុនខ្មែរទៅកាន់ឆាកអន្តរជាតិឲ្យកាន់តែមានភាពរឹងមាំខាងផ្នែកធនធានមនុស្សរបស់គុនខ្មែរ ទាំងគ្រូបង្វឹក និងកីឡាករ-កីឡាការិនី ដោយឈរលើចក្ខុវិស័យរួមរបស់ក្រុមហ៊ុន ក្នុងការវិនិយោគលើការអភិវឌ្ឍបណ្តុះបណ្តាលធនធានគុនខ្មែរកាន់តែមានគុណភាព។

តាមរយៈនេះ ក្នុងនាមក្រសួងអប់រំ លោក វ៉ាត់ ចំរើន បានសម្ដែងនូវការគាំទ្រទាំងស្រុង ចំពោះការបង្កើត និងដំណើរការវិទ្យាស្ថានបណ្ដុះបណ្ដាលគុនខ្មែរ ដែលជាសាលាបណ្តុះបណ្តាលធនធានគ្រូបង្វឹកគុនខ្មែរឲ្យមានកាន់តែច្រើន និងសប្បូរបែប ដើម្បីពង្រីកឥទ្ធិពលគុនខ្មែរទៅកាន់ឆាកអន្តរជាតិ ក៏ដូចជាជំរុញកីឡាគុនខ្មែរឆ្ពោះទៅរកសក្កានុពល ដើម្បីបញ្ចូលគុនខ្មែរចូលទៅក្នុងកីឡាអូឡាំពិកនាថ្ងៃអនាគត ស្របតាមទិសដៅរួមរបស់សហព័ន្ធគុនខ្មែរជាតិ និងអន្ដរជាតិនាពេលបច្ចុប្បន្ន។

ដោយឡែកលោក លីវ អឺលី ប្រធានវិទ្យាស្ថានបណ្ដុះបណ្ដាលគុនខ្មែរ បានសម្ដែងការរីករាយ ដែលទទួលបានការគាំទ្រពីក្រសួងអប់រំ ដែលជាការគាំទ្រនូវចក្ខុវិស័យរួមគ្នាក្នុងការលើកស្ទួយ និងផ្សព្វផ្សាយគុនខ្មែរឲ្យកាន់តែល្បីសុះសាយលើឆាកអន្តរជាតិ។ វិទ្យាស្ថានជាតិយុទ្ធគុនខ្មែរ ដែលបង្កើតឡើង គឺផ្តោតរួមបញ្ចូលគ្នាមួយសម្រាប់ការបង្រៀន ស្រាវជ្រាវ និងផ្សព្វផ្សាយ។ លោករំពឹងយ៉ាងមុតមាំថា កិច្ចសហប្រតិបត្តិការគាំទ្ររួមគ្នារបស់ភាគីទាំងពីរនេះ វិទ្យាស្ថាននឹងសម្រេចបានសមិទ្ធផលគួរកត់សម្គាល់ និងរុងរឿងសម្រាប់មរតកសិល្បៈក្បាច់គុនបុរាណខ្មែរ។

ជាមួយគ្នាលោក ខូវ ឆាយ បានចាត់ទុកការបង្កើតវិទ្យាស្ថានបណ្តុះបណ្តាលគុនខ្មែរ លើទឹកដីកម្ពុជានេះ គឺជាការបោះជំហានដ៏ធំមួយសម្រាប់គុនខ្មែរ ក្នុងការផ្សព្វផ្សាយ និងអភិវឌ្ឍន៍ទៅកាន់អន្តរជាតិ ដោយតាមរយៈការបណ្តុះបណ្តាលធនធានមូលដ្ឋានគ្រឹះនេះនឹងជំរុញឲ្យគ្រូបង្វឹក មន្ត្រីបច្ចេកទេសគុនខ្មែរ ក៏ដូចជាជនបរទេស ដែលស្រលាញ់ និងចង់ស្វែងយល់ពីគុនខ្មែរ ក្លាយជាជនបង្គោល សម្រាប់ការផ្សព្វផ្សាយ និងជំរុញគុនខ្មែរឲ្យចាក់ឫសចាក់គល់នៅលើឆាកអន្តរជាតិកាន់តែរឹងមាំផងដែរ៕