(បរទេស)៖ ក្រុមហ៊ុន Intel បានព្រមានវិនិយោគិននៅថ្ងៃព្រហស្បតិ៍សប្តាហ៍នេះថា ខ្លួនអាចនឹងត្រូវដកខ្លួនចេញពីអាជីវកម្មផលិតបន្ទះឈីប ប្រសិនបើមិនអាចស្វែងរកអតិថិជនខាងក្រៅធំៗដើម្បីផលិតបន្ទះឈីបនៅក្នុងរោងចក្ររបស់ខ្លួនបានទេនោះ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters កាលពីថ្ងៃទី២៥ ខែកក្កដា ឆ្នាំ២០២៥។

នាយកប្រតិបត្តិថ្មី លោក Lip-Bu Tan បានបញ្ជាក់ថា ភាពជោគជ័យនៃដំណើរការផលិតបន្ទះឈីប 14A របស់ពួកគេគឺពឹងផ្អែកលើការសហការជាមួយអតិថិជន។ ការព្រមាននេះកើតឡើងចំពេលដែលក្រុមហ៊ុនប្រកាសបញ្ឈប់បុគ្គលិកទ្រង់ទ្រាយធំ រួមជាមួយនឹងការព្យាករណ៍ការខាតបង់នៅត្រីមាសទី ៣ លើសពីការរំពឹងទុក។

ប្រសិនបើគ្មានអតិថិជនសំខាន់ទេ Intel អាចនឹងបញ្ឈប់ការអភិវឌ្ឍបន្ទះឈីប 14A និងបច្ចេកវិទ្យាបន្ទាប់បន្សំទៀត។ នេះជាការផ្លាស់ប្តូរជាប្រវត្តិសាស្ត្រសម្រាប់ក្រុមហ៊ុនដែលជាអ្នកត្រួសត្រាយផ្លូវក្នុងឧស្សាហកម្មបន្ទះឈីប។ Intel គឺជាក្រុមហ៊ុនផលិតបន្ទះឈីបតែមួយគត់របស់សហរដ្ឋអាមេរិកដែលមានសមត្ថភាពផលិតបន្ទះឈីបកុំព្យូទ័រទំនើបៗ ក៏បានជួបការលំបាកជាច្រើនឆ្នាំដោយសារកំហុសក្នុងការគ្រប់គ្រង ការខកខានក្នុងការប្រកួតប្រជែង AI និងការបាត់បង់ចំណែកទីផ្សារទៅកាន់គូប្រជែងចាស់របស់ខ្លួនគឺ AMD។

លោក Tan បានសង្កត់ធ្ងន់ថា ការវិនិយោគលើបន្ទះឈីប 14A នឹងផ្អែកលើការប្តេជ្ញាចិត្តរបស់អតិថិជន ហើយថាការសហការជិតស្និទ្ធជាមួយអតិថិជនតាំងពីដំបូង គឺជាកត្តាសំខាន់ដែលធ្វើឱ្យបន្ទះឈីប 14A មានសក្តានុពលជាងបច្ចេកវិទ្យា 18A ដែលនឹងចាប់ផ្តើមផលិតទ្រង់ទ្រាយធំនៅចុងឆ្នាំនេះ។

គួរជម្រាបថា ប្រសិនបើ Intel បញ្ឈប់ការផលិតផ្ទៃក្នុង នោះនឹងមានផលវិបាកធ្ងន់ធ្ងរ ដោយក្រុមហ៊ុននឹងពឹងផ្អែកលើ TSMC របស់តៃវ៉ាន់ ហើយអាចនឹងបាត់បង់គុណសម្បត្តិប្រកួតប្រជែង។ គិតត្រឹមថ្ងៃទី ២៨ ខែមិថុនា Intel មានឧបករណ៍ផលិតបន្ទះឈីបប្រហែល ១០០ ពាន់លានដុល្លារ។ ប្រសិនបើក្រុមហ៊ុនបញ្ឈប់ខ្សែសង្វាក់ផលិតកម្ម 14A របស់ខ្លួន ក្រុមហ៊ុនរំពឹងថា អាចបណ្តាលឱ្យមានការខូចខាតទ្រព្យសកម្មយ៉ាងច្រើន នេះបើយោងតាមឯកសាររបស់ក្រុមហ៊ុន៕