(បរទេស)៖ បណ្តាញផ្តល់សេវាអ៊ីនធឺណិត Starlink (ជាគម្រោងរបស់ Elon Musk តាមរយៈក្រុមហ៊ុន SpaceX) បានជួបការរំខានធំៗជាសកលនៅថ្ងៃព្រហស្បត្តិ៍សប្តាហ៍នេះ ដែលប៉ះពាល់ដល់អ្នកប្រើប្រាស់ជាច្រើន ពោលគឺលើសពី ៦០,០០០នាក់ នៅទូទាំងសហរដ្ឋអាមេរិក អឺរ៉ុប អាហ្វ្រិក និងអូស្ត្រាលីរងផលរំខាន។ ការរំខាននេះបានបន្តរយៈពេលប្រមាណជា ២ម៉ោងកន្លះ ដែលធ្វើឲ្យវាក្លាយជា​ការរំខានធ្ងន់ធ្ងរបំផុតក្នុងប្រវត្តិសាស្ត្រ​របស់បណ្តាញ Starlink។ នេះបើតាមការចេញផ្សាយដោយសារព័ត៌មាន Reuters នៅថ្ងៃទី២៥ ខែកក្កដា ឆ្នាំ២០២៥។

មូលហេតុនៃការរំខានត្រូវបានរកឃើញថា មកពីបញ្ហាផ្ទៃក្នុងនៃ Software ដែលគ្រប់គ្រងបណ្តាញស្នូល។ ក្រុមវិស្វកររបស់ Starlink លោក Michael Nicolls បានបញ្ជាក់ថា ក្រុមហ៊ុនកំពុងស៊ើបអង្កេតដើម្បីច្បាស់លាស់នូវគ្រោះថ្នាក់នេះ និងប្តេជ្ញាដោះស្រាយបញ្ហា។ ងាកមក លោក Elon Musk បានសុំអភ័យទោសតាមបណ្តាញ X (Twitter) បន្ទាប់ពីសេវាត្រូវបានស្ដារឡើងវិញ ដោយបាននិយាយថា «សុំទោសចំពោះការរំខាននេះ។ SpaceX នឹងរៀបចំដំណោះស្រាយជាប្រក្រតី ដើម្បីឲ្យវាមានភាពប្រសើរ និងដូចប្រក្រតីឡើងវិញ»។

គេបានដឹងថា មានអ្នកប្រើប្រាស់អ៊ិនធឺណិតរបស់ Starlink ប្រហែល ៦លាននាក់នៅក្នុងប្រទេសជាង ១៤០ប្រទេស ដែលបានទទួលផលប៉ះពាល់។ នៅអូស្ត្រាលី មានអ្នកប្រើប្រហែល ២០០,០០០នាក់ប៉ះពាល់ ដោយភាគច្រើននៅតំបន់ជនបទដូចជា Queensland និង Victoria។ ប្រទេសអ៊ុយក្រែនដែលពឹងផ្អែកលើ Starlink សម្រាប់ការទំនាក់ទំនងយោធា ក៏បានបញ្ជាក់ថា មានការរំខាននៅតំបន់សមរភូមិជួរមុខផងដែរ។

អ្នកវិភាគខ្លះសន្មតថា ប្រហែលមានកំហុសនៃការអាប់ដេតកម្មវិធី ឬអាចជាគ្រោះថ្នាក់ ចូលបំផ្លាញផ្នែកសន្តិសុខបច្ចេកវិទ្យា (Cyberattack) ផងដែរ ដោយសារតែការរំខានបានកើតឡើងភ្លាមៗ និងលាតសន្ធឹងជាសកល។ វាជាករណីរំខានដ៏ធំជាងគេនៅក្នុងប្រវត្តិសាស្ត្ររបស់ Starlink ហើយវាពិតជាមានសារៈសំខាន់ចំពោះសុវត្ថិភាពនៃបណ្តាញអ៊ីនធឺណិតនៅតំបន់ដាច់ស្រយាល៕