(បរទេស)៖ ខ្សែបម្រើសញ្ជាតិអាហ្សង់ទីន De Paul ពេលនេះបានសម្រេចការផ្ទេរចេញពីក្លិបអេស្ប៉ាញ Atletico Madrid ទៅលេងជាមួយក្លិប Inter Miami រួមគ្នាជាមួយមិត្តរួមសញ្ជាតិ Lionel Messi ក្នុងលីគអាមេរិក Major League Soccer ក្នុងលក្ខខណ្ឌកម្ចី ៦ខែដំបូង តែក៏ស្ថិតតក្នុងជម្រើសទិញផ្តាច់ផងដែរ ។

De Paul ជាកីឡាករខ្សែបម្រើម្នាក់ដែលអាចលេងនៅតំបន់បម្រើកណ្តាល និងស្លាបស្តាំលើទីលាន ក៏កំពុងមានកិច្ចព្រមព្រៀងជាមួយក្លិប Atletico Madrid ដល់ឆ្នាំ២០២៧ ក៏និងអាចស្ថិតក្នុងតម្លៃទិញផ្តាច់ចន្លោះជាង ១៥លានអឺរ៉ូ ហើយត្រូវបានគេរំពឹងថាអាចនឹងមានការចុះហត្ថលេខាលើកិច្ចព្រមព្រៀងរយៈពេល ៤ឆ្នាំទៅទៀត គឺដល់ឆ្នាំ២០២៩ ។

ខណៈការទៅដល់របស់បុរសវ័យ ៣១ឆ្នាំ De Paul ក្លាយជាជម្រើសល្អមួយដល់ក្រុមអាហ្សង់ទីន ដែលមានខ្សែប្រយុទ្ធឆ្នើម Lionel Messi នៅទីនោះ នឹងជាដៃគូសហការជួយជម្រើសជាតិលើកពាន FIFA World Cup 2022 នៅកាតា ។ ខណៈការលេងជាមួយក្លិប At Madrid រូបគេស៊ុតបាន ១៤គ្រាប់ពីការបង្ហាញខ្លួន ១៨៧ប្រកួតជាមួយក្លិបនៅ ៤រដូវកាលកន្លងមកនេះ ។

ជាមួយគ្នានោះ នៅពេលការផ្លាស់ប្តូរនេះអាចឈានដល់កិច្ចបព្រមព្រៀងទិញដាច់ជាអចិន្ត្រៃយ៍មែននោះ De Paul ដែលបច្ចុប្បន្នជាកីឡាករកំពុងមានតម្លៃទីផ្សារជាង ២៥លានអឺរ៉ូ នឹងក្លាយជាកីឡាករមានតម្លៃបំផុតនៅក្នុងលីគ MLS និងជាការចុះហត្ថលេខាដែលមានតម្លៃថ្លៃបំផុតទី៣ ក្នុងប្រវត្តិសាស្ត្រលីគ ៕