(បរទេស)៖ ក្រុមហ៊ុនផលិតរថយន្តអគ្គិសនីខ្នាតយក្សរបស់ចិន BYD គ្រោងនឹងចាប់ផ្តើមដំឡើងរថយន្តជាលើកដំបូងនៅក្នុងប្រទេសប៉ាគីស្ថាននៅខែកក្កដា ឬសីហា ឆ្នាំ២០២៦។ ការវិនិយោគនេះគឺដើម្បីឆ្លើយតបនឹងតម្រូវការដែលកំពុងកើនឡើងសម្រាប់រថយន្តអគ្គិសនី (EV) និងរថយន្ត Plug-in Hybrid (PHEV) នៅក្នុងតំបន់។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី២៥ ខែកក្កដា ឆ្នាំ២០២៥។

លោក Danish Khaliq អនុប្រធានផ្នែកលក់ និងយុទ្ធសាស្ត្ររបស់ BYD ប្រចាំប្រទេសប៉ាគីស្ថាន បានថ្លែងថា រោងចក្រនេះកំពុងសាងសង់នៅជិតទីក្រុង Karachi ក្រោមភាពជាដៃគូជាមួយក្រុមហ៊ុន Mega Motor Company ដែលជាបុត្រសម្ព័ន្ធរបស់ក្រុមហ៊ុន Hub Power។ រោងចក្រនេះនឹងមានសមត្ថភាពផលិតដំបូង ២៥,០០០ គ្រឿងក្នុងមួយឆ្នាំ។

បច្ចុប្បន្ន BYD បានចាប់ផ្តើមនាំចូលរថយន្ត EV ទៅកាន់ប្រទេសប៉ាគីស្ថានរួចហើយ។ លោក Khaliq រំពឹងថាទីផ្សារ EV និង PHEV នៅប៉ាគីស្ថាននឹងកើនឡើង ៣ ទៅ ៤ ដង នៅឆ្នាំ២០២៥ ពីចំនួនប្រហែល ១,០០០ គ្រឿង នៅឆ្នាំ២០២៤។ លើសពីនេះ BYD បានកំណត់គោលដៅកាន់កាប់ចំណែកទីផ្សាររហូតដល់ ៣០-៣៥% ក្នុងវិស័យនេះ។

រោងចក្រនឹងចាប់ផ្តើមដំឡើងគ្រឿងបន្លាស់នាំចូល ដោយមានការផលិតគ្រឿងបន្លាស់មិនមែនអគ្គិសនីមួយចំនួនក្នុងស្រុក។ ផលិតផលដំបូងនឹងបម្រើទីផ្សារក្នុងស្រុក ហើយអាចនឹងពង្រីកទៅការនាំចេញទៅកាន់ប្រទេសដែលមានចង្កូតស្តាំក្នុងតំបន់នាពេលអនាគត។

គួរជម្រាបថា BYD នឹងដាក់បង្ហាញរថយន្តភីកអាប់ PHEV ម៉ូដែល Shark 6 របស់ខ្លួននៅប៉ាគីស្ថាននៅថ្ងៃសុក្រនេះ។ រថយន្ត PHEV ត្រូវបានគេមើលឃើញថាជាជម្រើសល្អប្រសើរនៅប៉ាគីស្ថាន ដោយសារប្រទេសនេះនៅមានការខ្វះខាតស្ថានីយ៍សាកថ្មសម្រាប់រថយន្តអគ្គិសនីសុទ្ធសាធ៕