(ភ្នំពេញ)៖ ក្លិបបាល់ទាត់នៃលីគកំពូលកម្ពុជា ភ្នំពេញក្រោន នាថ្ងៃទី២៦ ខែកក្កដានេះ បានចេញសេចក្តីប្រកាសថា បានសម្រេចផ្អាកការសហការលើការឧបត្ថម្ភជាបណ្តោះអាសន្ន ជាមួយក្រុមហ៊ុនផ្គគ់ផ្គងសម្លៀកបំពាក់ Warrix ខណៈដែលទំនាក់ទំនងរវាងប្រទេសទាំងពីរកំពុងមានការប្រែប្រួលគួរឱ្យកត់សម្គាល់។

ខាងក្រោមនេះជាសេចក្តីថ្លែងការណ៍របស់ក្លិបបាល់ទាត់ភ្នំពេញក្រោន៖

យើងខ្ញុំមានកិត្តិយសសូមជម្រាបជូនអ្នកគាំទ្រ និងសាធារណជន មេត្តាជ្រាបថា ក្លិបបាល់ទាត់ភ្នំពេញក្រោន និងក្រុមហ៊ុនផ្គត់ផ្គង់សម្លៀកបំពាក់ Warrix បានឯកភាពគ្នាក្នុងការផ្អាកការឧបត្ថម្ភជាបណ្តោះអាសន្ន ខណៈដែលទំនាក់ទំនងរវាងប្រទេសទាំងពីរកំពុងមានការប្រែប្រួលគួរឱ្យកត់សម្គាល់។

ការសម្រេចចិត្តនេះបានធ្វើឡើងបន្ទាប់កិច្ចពិភាក្សាយ៉ាងយកចិត្តទុកដាក់ប្រកបដោយភាពស្និទ្ធស្នាលក្នុងស្មារតីកីឡា និងសាមគ្គីភាពដើម្បីការពាររូបភាពជាវិជ្ជមានរបស់ស្ថាប័នទាំងពីរព្រមទាំងផ្តោតជាអាទិភាពលើគុណតម្លៃនៃវិស័យបាល់ទាត់ដោយមិនមានគំនាបពីមជ្ឈដ្ឋានណាមួយឡើយ។

សូមបញ្ជាក់ថា ក្រុមរបស់យើងនឹងបន្តប្រើប្រាស់ឈុតបច្ចុប្បន្នជាបណ្ដោះអាសន្ន ខណៈពេលដែលក្លិបកំពុងស្វែងរកដៃគូផ្គត់ផ្គង់សម្លៀកបំពាក់ថ្មីផងដែរ។ យើងខ្ញុំនៅតែប្តេជ្ញារក្សាទំនាក់ទំនងដ៏រឹងមាំរបស់យើងជាមួយក្រុមហ៊ុន Warrix ហើយទន្ទឹងរង់ចាំបន្តភាពជាដៃគូពេញលេញនៅក្នុងពេលវេលាសមស្របណាមួយនាពេលអនាគត។

ទន្ទឹមនឹងនេះ យើងខ្ញុំសូមថ្លែងអំណរគុណយ៉ាងជ្រាលជ្រៅចំពោះអ្នកគាំទ្ររបស់យើង និងស្នើសុំការយោគយល់ហើយបន្តការគាំទ្រក្លិបបាល់ទាត់ភ្នំពេញក្រោនសម្រាប់រដូវកាលថ្មីនេះ ។

សូមជម្រាបថា ភាពតានតឹង នៃការផ្ទុះអាវុធរវាងកម្ពុជា-ថៃ បានកើតឡើងនៅព្រឹកថ្ងៃទី២៤ ខែកក្កដា ឆ្នាំ២០២៥នេះ នៅចំណុចប្រាសាទតាមាន់ធំ ខេត្តឧត្តរមានជ័យ ដោយបានរាលដាលទៅកាន់តំបន់សមរភូមិផ្សេងទៀត នៅតាមបណ្តោយព្រំដែនកម្ពុជា-ថៃ។ ការប្រយុទ្ធគ្នានេះ បានកើតឡើងបន្ទាប់ពីភាគីថៃ បានផ្ទុះអាវុធមុន នៅចំណុចប្រាសាទតាមាន់ធំ៕

សូមជម្រាបថា ភាពតានតឹង នៃការផ្ទុះអាវុធរវាងកម្ពុជា-ថៃ បានកើតឡើងនៅព្រឹកថ្ងៃទី២៤ ខែកក្កដា ឆ្នាំ២០២៥នេះ ដែលបង្កឡើយមុនដោយកងទ័ពថៃ នៅចំណុចប្រាសាទតាមាន់ធំ ខេត្តឧត្តរមានជ័យ ដោយបានរាលដាលទៅកាន់តំបន់សមរភូមិផ្សេងទៀត នៅតាមបណ្តោយព្រំដែនកម្ពុជា-ថៃ។ ការប្រយុទ្ធគ្នានេះ បានកើតឡើងបន្ទាប់ពីភាគីថៃ បានផ្ទុះអាវុធមុន នៅចំណុចប្រាសាទតាមាន់ធំ៕