(បរទេស)៖ អ្នកនាំពាក្យរបស់ទីភ្នាក់ងារអវកាសជាតិអាមេរិក (NASA) បានថ្លែងនៅថ្ងៃសុក្រសប្តាហ៍នេះថា បុគ្គលិកប្រហែល ២០% នៃទីភ្នាក់ងារនេះ នឹងចាកចេញពីស្ថាប័ន។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី២៦ ខែកក្កដា ឆ្នាំ២០២៥។

អ្នកនាំពាក្យរូបនេះបានបន្តថា បុគ្គលិកប្រមាណ ៣.៨៧០ នាក់ ត្រូវបានគេរំពឹងថានឹងចាកចេញ ប៉ុន្តែចំនួននេះអាចនឹងមានការប្រែប្រួលក្នុងរយៈពេលប៉ុន្មានថ្ងៃ និងសប្តាហ៍ខាងមុខនេះ។ លោកបានបន្ថែមថា ចំនួនបុគ្គលិកដែលនៅសល់ក្នុងទីភ្នាក់ងារនេះនឹងមានប្រមាណ ១៤.០០០ នាក់។

ទោះជាយ៉ាងណាក៏ដោយ មូលហេតុលម្អិត នៃរបាយការណ៍នេះមិនត្រូវបានបង្ហាញនោះទេ។ ការចាកចេញរបស់បុគ្គលិកមួយចំនួនធំនេះ អាចជាការផ្លាស់ប្តូរដ៏សំខាន់មួយសម្រាប់ទីភ្នាក់ងារអវកាស ដែលទទួលខុសត្រូវលើបេសកកម្មស្រាវជ្រាវ និងអភិវឌ្ឍន៍បច្ចេកវិទ្យាអវកាសដ៏ធំសម្បើមរបស់សហរដ្ឋអាមេរិក៕