(ភ្នំពេញ)៖ ក្រុមបាល់ទាត់មិត្តវ័យចាស់កីឡា និងក្រុម K8 FC កាលពីល្ងាចថ្ងៃទី២៧ ខែកក្កដាកន្លងទៅ បានណាត់គ្នាប្រកួតមិត្តភាព ដើម្បីកៀគរសម្ភារជួយដល់កងទ័ពជួរមុខ ដែលកំពុងប្រយុទ្ធការពារបូរណភាពទឹកដីយ៉ាងអង់អាចក្លាហាននៅសមរភូមិមុខ និងបានអំពាវនាវសហគមន៍អន្ដរជាតិ ធ្វើការពិនិត្យ និងថ្កោលទោសយ៉ាងដាច់អហង្ហារ ចំពោះសកម្មភាពថៃឈ្លានពានដ៏ព្រៃផ្សៃមកលើអធិបតេយ្យភាពកម្ពុជា។

លោក អ៊ូ រតនា ប្រធានក្រុមបាល់ទាត់មិត្តវ័យចាស់កីឡា បានបញ្ជាក់ថា ការរួបរួមក្នុងនាមពលរដ្ឋខ្មែរ ក្រោមសកម្មភាពកីឡាខាងលើ គឺដើម្បីបង្ហាញពីកម្លាំងសាមគ្គីរបស់សមរភូមិក្រោយគ្រប់រូបភាព មិនថាប្រជាជន ឬកីឡាករ-កីឡាការិនី ដើម្បីជួយជ្រោមជ្រែង និងផ្ដល់កម្លាំងចិត្តដល់កងទ័ពជួរមុខ ដែលបានខិតខំលះបង់សាច់ស្រស់ឈាមស្រស់ដើម្បីការពារបូរណភាពទឹកដី ដោយមានប្រជាជន ១៧លាននាក់នៅពីក្រោយ រួមគ្នាកំចាត់ចោរឈ្លានពាន។

លោកបន្ដថា «ស្របតាមអនុសាសន៍ដ៏ខ្ពង់ខ្ពស់របស់សម្ដេចតេជោ ហ៊ុន សែន, សម្ដេចបវរធិបតី ហ៊ុន ម៉ាណែត ក៏ដូចជាប្រសាសន៍ឯកឧត្តមឧបនាយករដ្ឋមន្ដ្រី ហ៊ុន ម៉ានី ក្នុងនាមយើងជាប្រជាពលរដ្ឋកម្ពុជាទាំងមូល យើងនៅតែរក្សាការគាំទ្រពីសមរភូមិក្រោយ ទៅសមរភូមិមុខជានិច្ច គឺយើងធ្វើរបៀបភ្លៀងរលឹម ដរាបណាដែលសត្រូវនៅតែបន្ដឈ្លានពាន ក្នុងនាមប្រជាពលរដ្ឋ យើងនៅតែបន្ដគាំទ្រដល់បងប្អូនកងទ័ពសមរភូមិមុខ មិនឲ្យពួកចោរឈ្លានពានមានឱកាសសម្រេចមហិច្ឆតាឡើយ»។

លោក អ៊ូ រតនា បន្ថែមថា «ខ្ញុំសូមអំពាវនាវដល់សមាគមន៍អន្ដរជាតិ ជួយពិនិត្យទៅលើការឈ្លានពានរបស់ថៃពេលនេះ កំពុងតែបំផ្លិចបំផ្លាញទៅដល់សម្បត្តិបេតិកភណ្ឌពិភពលោក ដូចជាប្រាសាទព្រះវិហារ និងកំពុងតែបំផ្លាញទីវត្តអារាម ធ្វើឲ្យប្រជាពលរដ្ឋរាប់ម៉ឺននាក់ ទាំងចាស់ ស្ដ្រី និងកុមារ បាត់បង់ជម្រក បំផ្លាញសាលារៀន មន្ទីរពេទ្យ និងផ្ទះប្រជាពលរដ្ឋស្លូតត្រង់ជាច្រើន ។ ខ្ញុំសូមឲ្យអន្ដរជាតិធ្វើការថ្កោលទោសដាច់អហង្ហារចំពោះអំពើឈ្លានពាន អំពើល្មោបសង្គ្រាមរបស់ភាគីថៃ ។ សូមពិភពលោក ពិសេសអង្គការសហប្រជាជាតិ និងអង្គការសិទ្ធមនុស្ស ត្រូវតែមានវិធានការដាច់ខាត ចំពោះក្រុមល្មោបសង្គ្រាមទាំងអស់នេះ ឲ្យស័ក្ដិសមនឹងអ្វីដែលពួកគេបានឈ្លានពាន និងរំលោភបំពានយ៉ាងព្រៃផ្សៃលើទឹកដីកម្ពុជា»។

ជាមួយគ្នា លោក រិទ្ធិ ឌីកា ប្រធានក្រុមបាល់ទាត់ K8 FC បន្ថែមថា ការចូលរួមរបស់ប្រជាពលរដ្ឋខ្មែរពេលនេះ ទោះបីតិចក្ដីច្រើនក្ដី តែជាទឹកចិត្ត និងសាមគ្គីភាពដ៏សំខាន់ ដើម្បីគាំទ្រដល់កងទ័ពជួរមុខ ។ លោកថា កម្ពុជាស្រលាញ់សន្ដិភាព និងចង់បានសន្ដិភាព ប៉ុន្ដែក្នុងកាលៈទេសៈនៃការឈ្លានពានរបស់ភាគីថៃ ក្នុងនាមប្រជាពលរដ្ឋ លោកគាំទ្ររាល់វិធានាការរបស់ថ្នាក់ដឹកនាំ ដើម្បីការពារបូរណភាពទឹកដី ហើយលោកក៏សង្ឃឹមថា ប្រជាពលរដ្ឋទាំងអស់ នឹងបន្ដសាមគ្គីភាពលើផ្លូវតែមួយ ដើម្បីរក្សាបាននូវទឹកដី និងប្រទេសដ៏ស្រស់ស្អាតមួយនេះ ក្រោមគោលការណ៍ណែនាំនានារបស់ប្រមុខរាជរដ្ឋាភិបាលកម្ពុជា។

គួរដឹងថា សម្ភារទទួលបានពីការកៀគរតាមរយៈការប្រកួតបាល់ទាត់មិត្តភាពវ័យចាស់នេះ ត្រូវបានប្រគល់ជូនលោក ណុប រតនៈ សម្រាប់នាំយកទៅប្រគល់ជូនដល់កងកម្លាំងបញ្ជាការដ្ឋានអង្គរក្ស និងកងកម្លាំងកាំភ្លើងធំ ដែលកំពុងឈរយ៉ាងអង់អាចក្លាហានក្នុងការប្រយុទ្ធការពារបូរណភាពទឹកដី និងប្រជាជន ជាមួយចោរឈ្លានពានថៃ នៅសមរភូមិមុខ។ សម្ភារទទួលបានពីការកៀគរនេះ មានដូចជាត្រីងៀត, ត្រីខ, ភេសជ្ជៈ, ទឹកសុទ្ធ, មី, សាប៊ូកក់សក់, កាហ្វេ, ធុបមូខ, ទឹកស៊ីអ៊ីវ, ទឹកប្រេងខ្យង, ទឹកដោះគោ និងពងទាជាដើម៕