(បរទេស)៖​ លេខាធិការក្រសួងពាណិជ្ជកម្មសហរដ្ឋអាមេរិក លោក Howard Lutnick បានប្រកាសនៅថ្ងៃទី២៧​ ខែកក្កដា ឆ្នាំ២០២៥​ បានប្រកាសថា ប្រធានាធិបតី Donald Trump ពិតជាចូលចិត្ត TikTok ពីព្រោះវាជាកម្មវិធីដែលអាចទាក់ទាញយុវជនអាមេរិកបានយ៉ាងខ្លាំង។ ទោះយ៉ាងណា លោកបានសង្កត់ធ្ងន់ថា កម្មវិធី TikTok ដែលជាកម្មសិទ្ធិរបស់ក្រុមហ៊ុនចិន ByteDance ត្រូវតែផ្លាស់ប្ដូរមកជាទ្រព្យសម្បត្តិអាមេរិក បើមិនដូច្នោះទេ វាអាចនឹងត្រូវបិទនៅក្នុងសហរដ្ឋអាមេរិក។

លោក Lutnick បានបញ្ជាក់ថា វាទៅមិនរួចទេ សម្រាប់កម្មវិធីដែលគ្រប់គ្រងដោយរដ្ឋាភិបាលចិន នឹងនៅតែមានវត្តមាននៅលើទូរស័ព្ទរបស់ជនអាមេរិកជាង ១៧០លាននាក់។ ដូច្នេះ TikTok ត្រូវផ្លាស់ប្ដូរទៅជាកម្មសិទ្ធអាមេរិក ដែលមានការគ្រប់គ្រងលើបច្ចេកវិទ្យា និង algorithm​ របស់វា។

ក្រុមហ៊ុន ByteDance ត្រូវបង្ខំឱ្យលក់ចេញនូវអាជីវកម្ម​ TikTok ក្នុងសហរដ្ឋអាមេរិក ដោយផ្អែកលើច្បាប់ ការការពារជនអាមេរិកពីកម្មវិធីដែលគ្រប់គ្រងដោយប្រទេសគូប្រជែងដែលជាច្បាប់ថ្មីបានអនុម័តនៅឆ្នាំ២០២៤។ ច្បាប់នេះកំណត់ឱ្យ TikTok លក់អាជីវកម្មរបស់ខ្លួននៅអាមេរិកទៅឲ្យក្រុមហ៊ុអាមេរិក​មុនថ្ងៃ១៧​ ខែកញ្ញា ឆ្នាំ២០២៥។ ប្រសិនបើពុំអាចបានការយល់ព្រមពីរដ្ឋាភិបាលចិនសម្រាប់ការលក់នេះ TikTok អាចត្រូវបិទ នៅក្នុងសហរដ្ឋអាមេរិក។

ប្រធានាធិបតីអាមេរិកលោក Trump បានបញ្ជាក់កាលពីខែមិថុនា២០២៥ ថា មានក្រុមអ្នកវិនិយោគដែលមានទ្រព្យសម្បត្តិខ្ពស់ កំពុងពិចារណាទិញ TikTok ប៉ុន្តែការពិភាក្សានៅតែបន្តមានការរាំងស្ទះ ដោយសារការកើនឡើងនៃពន្ធនាំចូល និងភាពតានតឹងរវាងសហរដ្ឋអាមេរិក និងចិន៕