(បរទេស)៖ ក្រុមហ៊ុន Samsung Electronics បានចុះកិច្ចព្រមព្រៀងផ្គត់ផ្គង់បន្ទះឈីបទៅឱ្យក្រុមហ៊ុន Tesla Inc។ នេះបើយោងតាមប្រភពជិតស្និទ្ធពីរបានប្រាប់ Reuters នៅថ្ងៃចន្ទ ទី២៨ ខែកក្កដា ឆ្នាំ២០២៥។ កិច្ចព្រមព្រៀងនេះគឺជាការជំរុញយ៉ាងសំខាន់ដល់អាជីវកម្មផលិតបន្ទះឈីបតាមកិច្ចសន្យារបស់ក្រុមហ៊ុនបច្ចេកវិទ្យាកូរ៉េខាងត្បូងមួយនេះ ដែលកំពុងជួបការខាតបង់។

កាលពីថ្ងៃសៅរ៍ ក្រុមហ៊ុន Samsung បានប្រកាសពីកិច្ចព្រមព្រៀងផ្គត់ផ្គង់បន្ទះឈីបដែលមានតម្លៃ ១៦.៥ ពាន់លានដុល្លារ ជាមួយក្រុមហ៊ុនសកលលោកដ៏ធំមួយ ប៉ុន្តែមិនបានបញ្ចេញឈ្មោះអតិថិជននោះទេ។ ក្រុមហ៊ុនបានបញ្ជាក់ថា អតិថិជនបានស្នើសុំរក្សាការសម្ងាត់អំពីព័ត៌មានលម្អិតនៃកិច្ចព្រមព្រៀងនេះ ដែលនឹងបន្តរហូតដល់ចុងឆ្នាំ ២០៣៣។

កិច្ចព្រមព្រៀងនេះកើតឡើង ខណៈដែល Samsung កំពុងប្រឈមមុខនឹងសម្ពាធកាន់តែខ្លាំងឡើងក្នុងការប្រកួតប្រជែងផលិតបន្ទះឈីប បញ្ញាសិប្បនិម្មិត (AI chips) ដែលខ្លួនកំពុងតាមពីក្រោយគូប្រជែងដូចជា TSMC និង SK Hynix។ ការយឺតយ៉ាវនេះបានប៉ះពាល់យ៉ាងខ្លាំងដល់ប្រាក់ចំណេញ និងតម្លៃភាគហ៊ុនរបស់ខ្លួន។

លោក Pak Yuak អ្នកវិភាគនៅ Kiwoom Securities បានថ្លែងថា កិច្ចព្រមព្រៀងចុងក្រោយនេះនឹងជួយកាត់បន្ថយការខាតបង់នៅក្នុងអាជីវកម្មផលិតបន្ទះឈីបរបស់ Samsung ដែលលោកបានប៉ាន់ប្រមាណថាមានចំនួនលើសពី ៥ ទ្រីលានវ៉ុន (ប្រហែល ៣.៦៣ ពាន់លានដុល្លារ) ក្នុងត្រីមាសទីមួយនៃឆ្នាំនេះ។ លោកបានលើកឡើងផងដែរថា Samsung មានការលំបាកក្នុងការរក្សាអតិថិជនសំខាន់ៗ ខណៈដែលពួកគេបានងាកទៅរក TSMC សម្រាប់បន្ទះឈីបទំនើប។ TSMC មានអតិថិជនល្បីៗដូចជា Apple, Nvidia និង Qualcomm ជាដើម។

បច្ចុប្បន្ន Samsung កំពុងព្យាយាមបង្កើនទិន្នផលផលិតកម្មនៃបច្ចេកវិទ្យា 2-nanometer (ណាណូម៉ែត្រ) ចុងក្រោយបង្អស់របស់ខ្លួន។ ទោះជាយ៉ាងណា ការបញ្ជាទិញបន្ទះឈីបសម្រាប់ Tesla នេះ ទំនងជាមិនពាក់ព័ន្ធនឹងបច្ចេកវិទ្យាទំនើបបំផុតនេះទេ៕