(បរទស)៖​ នៅក្នុងសន្និបាតបញ្ញាសិប្បនិម្មិត (WAIC) ដែលប្រព្រឹត្តទៅនៅទីក្រុងសៀងហៃ ចាប់ពីថ្ងៃទី ២៥ ដល់ ២៨ ខែកក្កដា ឆ្នាំ២០២៥ ក្រុមហ៊ុន AI ឈានមុខគេ​របស់ចិន បានចូលរួមបង្កើតក្រុមហ៊ុនធំៗ២ ដើម្បីជំរុញអភិវឌ្ឍន៍បច្ចេកវិទ្យាក្នុងស្រុក និងកាត់បន្ថយការពឹងផ្អែកលើបច្ចេកវិទ្យាអាមេរិក។​ នេះបេីតាមការចេញផ្សាយដោយសារព័ត៌មាន​ Reuters នៅថ្ងៃទី២៩​ ខែកក្កដា​ ឆ្នាំ២០២៥។

ក្រុមហ៊ុនទី១​ គឺ​ Model‑Chip Ecosystem Innovation Alliance​ ដែលរួមបញ្ចូលក្រុមហ៊ុនផលិតឈីបដូចជា Huawei, Biren, Moore Threads, និង Enflame​ ព្រមទាំងក្រុមហ៊ុនអភិវឌ្ឍម៉ូឌែល LLM ដូចជា StepFun ។ សម្រាប់គោលបំណង​ គឺបង្កើតបណ្តាញបច្ចេកវិទ្យាជាតិចាប់ពីបន្ទះឈីប ចូលដល់ម៉ូឌែល និងហេដ្ឋារប
ចនាសម្ព័ន្ធចុងក្រោយ ដើម្បីជំនួសនូវបច្ចេកវិទ្យា AI ដែលពឹងផ្អែកលើអាមេរិក។ លោក Zhao Lidong នាយកប្រតិបត្តិនៃ Enflame បាននិយាយថា​ "នេះគឺជាប្រព័ន្ធអេកូស៊ីស្ទឹមច្នៃប្រឌិតមួយ ដែលភ្ជាប់ខ្សែសង្វាក់បច្ចេកវិទ្យាផ្ដាច់មុខចាប់ពីឈីបរហូតដល់ម៉ូឌែល និងហេដ្ឋារចនាសម្ព័ន្ធ"។

ទី២​ គឺគណៈកម្មាធិការបញ្ញាសិប្បនិម្មិតនៃសហព័ន្ធពាណិជ្ជកម្មសៀងហៃ​ ដែលមានគោលបំណងជំរុញឲ្យ AI ចូលទៅក្នុងវិស័យឧស្សាហកម្មក្នុងស្រុក​ រួមមានក្រុមហ៊ុនដូចជា SenseTime, MiniMax, Metax, Iluvatar CoreX និង StepFun។ ការពង្រឹងបន្ថែមនេះ​ គឺបន្ទាប់ពីសហរដ្ឋអាមេរិកដាក់ កំហិតនាំចេញឈីប AI ដល់ចិន ជាពិសេសឈីបខ្លាំងៗរបស់ Nvidia ដូចជា H100 និង GB200។ ការបង្កើតសម្ព័ន្ធនេះមានបំណង អភិវឌ្ឍសមត្ថភាពក្នុងស្រុក ដើម្បីបំពេញការខ្វះខាតពីការរឹតបន្តឹង។

គួរជម្រាបថា​ ចិនមានបំណបពន្លឿនការផលិត AI ក្នុងស្រុក​ការកាត់បន្ថយការពឹងផ្អែកលើអាមេរិក​ និងមានជំហរថ្មីលើការផ្តល់សិទ្ធិជាតិនិយមនៃបច្ចេកវិទ្យា។ វាក៏ជាការបង្ហាញថា​ ការរឹតបន្តឹងរបស់អាមេរិកអាចនាំឲ្យចិនក្លាយជាប្រទេសឯករាជ្យផ្នែកបច្ចេកវិទ្យា​ តាមរយះបង្កើនការប្រកួតប្រជែងសកលនៅក្នុងវិស័យ AI៕