(បរទេស)៖ នៅថ្ងៃចន្ទដើមសប្តាហ៍នេះ ក្រុមហ៊ុន Microsoft បានប្រកាសជាផ្លូវការនូវមុខងារថ្មីមួយដែលមានឈ្មោះថា «Copilot Mode» នៅលើកម្មវិធីរុករក Edge របស់ខ្លួន ដែលប្រើប្រាស់បញ្ញាសិប្បនិម្មិត (AI) ដើម្បីបង្កើនប្រសិទ្ធភាពបទពិសោធន៍នៃការប្រើប្រាស់អ៊ីនធឺណិត។ ការប្រកាសនេះធ្វើឡើង ខណៈដែលក្រុមហ៊ុនបច្ចេកវិទ្យាយក្សមួយនេះ កំពុងប្រញាប់ប្រជែងជាមួយក្រុមហ៊ុនគូប្រជែងដទៃទៀត ដែលបាននិងកំពុងបញ្ចេញកម្មវិធីរុករក និងមុខងារស្វែងរកតាមគេហទំព័រដែលបំពាក់ដោយ AI។ នេះបើយោងតាមការចេញផ្សាយដោយ CNA នៅថ្ងៃទី២៩ ខែកក្កដា ឆ្នាំ២០២៥។

យោងតាមក្រុមហ៊ុន Microsoft បានឱ្យដឹងថា មុខងារ Copilot Mode នេះអាចជួយបំពេញកិច្ចការនានា រៀបចំការរុករកទៅជាសំណួរផ្អែកលើប្រធានបទ និងប្រៀបធៀបលទ្ធផលឆ្លងកាត់ផ្ទាំង (tabs) ទាំងអស់ដែលបានបើក ដោយមិនតម្រូវឱ្យអ្នកប្រើប្រាស់ប្តូររវាងផ្ទាំងនោះទេ។

ការធ្វើបច្ចុប្បន្នភាពនេះ កើតឡើងចំពេលដែលក្រុមហ៊ុនបច្ចេកវិទ្យាជាច្រើនបានបញ្ចេញឧបករណ៍ស្វែងរកតាមអ៊ីនធឺណិតដែលដំណើរការដោយ AI រួចមកហើយ ដូចជា Perplexity AI ជាមួយកម្មវិធីរុករក Comet និងព័ត៌មានអំពីកម្មវិធីរុករក AI របស់ OpenAI។ ក្រុមហ៊ុន Alphabet ក៏បានចាប់ផ្តើមមុខងារ «AI Mode» នៅលើ Google កាលពីដើមឆ្នាំនេះផងដែរ។

Microsoft បានបញ្ជាក់ថា ក្រោមមុខងារថ្មីនេះ អ្នកប្រើប្រាស់នឹងឃើញទំព័រមួយដែលមានប្រអប់បញ្ចូលតែមួយគត់ដែលរួមបញ្ចូលមុខងារជជែក ស្វែងរក និងរុករកគេហទំព័រ។ Copilot ក៏នឹងគាំទ្រការរុករកដោយសំឡេងផងដែរ។ នាពេលឆាប់ៗនេះ អ្នកប្រើប្រាស់ក៏នឹងអាចអនុញ្ញាតឱ្យ Copilot ចូលប្រើប្រាស់ប្រវត្តិរុករក និងព័ត៌មានសម្គាល់ខ្លួន ដើម្បីធ្វើសកម្មភាពជាក់លាក់បន្ថែមទៀតដូចជាការកក់ទុក (Booking) ឬការគ្រប់គ្រងកិច្ចការផ្សេងៗ។

មុខងារនេះនឹងមានសម្រាប់ប្រើប្រាស់ដោយឥតគិតថ្លៃនៅទូទាំងទីផ្សារ Copilot សម្រាប់កុំព្យូទ័រ Windows និង Mac ក្នុងរយៈពេលកំណត់ ហើយអ្នកប្រើប្រាស់អាចជ្រើសរើសបិទវាបានតាមរយៈការកំណត់របស់ Edge៕