(ភ្នំពេញ)៖ ធនាគារ អ៊ឹមប៊ី (ខេមបូឌា) ម.ក ហៅកាត់ថា (“ធនាគារ អ៊ឹមប៊ី (ខេមបូឌា”) នាថ្ងៃទី២៩ ខែកក្កដា ឆ្នាំ២០២៥នេះ បានប្រកាសពីការផ្តល់ជូននូវអត្ថប្រយោជន៍បន្ថែមដល់អតិថិជនរបស់ខ្លួន តាមរយៈការផ្តល់ជូននូវសេវាផ្ទេរប្រាក់ទៅប្រទេសវៀតណាមដោយឥតគិតថ្លៃ ចាប់ពីថ្ងៃនេះរហូតដល់ថ្ងៃទី៣១ ខែធ្នូ ឆ្នាំ២០២៥។ យុទ្ធនាការនេះបានបង្ហាញពីការប្តេជ្ញាចិត្តរបស់ធនាគារ ក្នុងការផ្តល់ជូននូវសេវាហិរញ្ញវត្ថុដែលប្រកបដោយសុវត្ថិភាពខ្ពស់​ មានភាពងាយស្រួល និងលក្ខខណ្ឌកាន់តែល្អប្រសើរ ហើយនេះគឺជាផ្នែកមួយដ៏សំខាន់ក្នុងការជំរុញកំណើនសេដ្ឋកិច្ច និងពង្រឹងពាណិជ្ជកម្មរវាងប្រទេសកម្ពុជា និងវៀតណាមផងដែរ។

តាមរយៈសេវាធនាគារចល័ត (MBCambodia My Bank App) របស់ ធនាគារ អ៊ឹមប៊ី (ខេមបូឌា) អតិថិជនអាចផ្ទេរប្រាក់ទៅវៀតណាមដោយឥតគិតកម្រៃសេវា និងដោយមិនមានកំណត់ទំហំសាច់ប្រាក់ ឬចំនួនដងនៃការធ្វើប្រតិបត្តិការដើម្បីទទួលបានកម្មវិធីពិសេសនេះឡើយ ចំពោះចំនួនកំណត់នៃប្រតិបត្តិការប្រចាំថ្ងៃគឺយោងទៅតាមប្រភេទគណនី និងលក្ខខណ្ឌនៃការស្គាល់អតិថិជន (KYC Requirements) ។ ធនាគារ អ៊ឹមប៊ី (ខេមបូឌា) បាន និងកំពុងធ្វើឲ្យការផ្ទេរប្រាក់ឆ្លងប្រទេសកាន់តែសាមញ្ញ និងងាយស្រួលជាងមុន ដែលមានភាពសមស្របបំផុតសម្រាប់អតិថិជនទាំងរូបវ័ន្តបុគ្គល ម្ចាស់អាជីវកម្ម កម្មករនិយោជិត ដែលត្រូវការផ្ញើប្រាក់ទៅកាន់ដៃគូអាជីវកម្ម ឬសាច់ញាតិរបស់ខ្លួននៅវៀតណាម។

លោក Nguyen Anh Khanh អគ្គនាយក របស់ ធនាគារ អ៊ឹមប៊ី (ខេមបូឌា) បានមានប្រសាសន៍ថា អ៊ឹមប៊ី គ្រុប (MB Group) ដែលជាក្រុមហ៊ុនអាណាព្យាបាលរបស់យើង ទទួលបាននូវភាពជោគជ័យអស់រយៈកាលជាយូរឆ្នាំរួចមកហើយ ក្នុងការផ្តល់ជូនសេវាហិរញ្ញវត្ថុដ៏ល្អប្រសើរជូនអតិថិជនរបស់ខ្លួន ហើយធនាគារ អ៊ឹមប៊ី (ខេមបូឌា) មានមោទកភាពក្នុងការចូលរួមសម្រេចឱ្យបាននូវភាពជោគជ័យនេះសម្រាប់កម្ពុជា។ យើងប្តេជ្ញាចិត្តយ៉ាងមោះមុតក្នុងការគាំទ្រអត្ថប្រយោជន៍លើសេវាហិរញ្ញវត្ថុជូនប្រជាជនកម្ពុជា និងចូលរួមជាផ្នែកមួយក្នុងការអភិវឌ្ឍប្រកបដោយចីរភាព ដោយធានាបាននូវការអនុលោមតាមបទប្បញ្ញត្តិរបស់ធនាគារជាតិនៃកម្ពុជា និងអាជ្ញាធរពាក់ព័ន្ធគ្រប់កម្រិត។

ក្នុង​នាម​ជា​ដៃគូ​ក្នុង​តំបន់​ដែល​គួរ​ឱ្យ​ទុក​ចិត្ត​ កម្ពុជា​និង​វៀតណាម​កំពុង​ពង្រឹង​ទំនាក់ទំនង​តាម​រយៈ​ការ​បង្កើន​ពាណិជ្ជកម្ម​ និងការ​វិនិយោគ​ ហើយ​ការផ្តល់ជូនកម្មវិធីពិសេសផ្ទេរប្រាក់ទៅវៀតណាមដោយមិនអស់ថ្លៃសេវា​នឹងក្លាយជាចំណែកដ៏សំខាន់មួយក្នុងការជម្រុញកិច្ចការងារនេះ ក៏ដូចជា​ស្រប​តាម​ចក្ខុវិស័យ​របស់​យើងក្នុងការ “ក្លាយជាធនាគារដែលផ្តល់ភាពងាយស្រួលបំផុតតាមរយៈបច្ចេកវិទ្យាឌីជីថលទំនើប។

លោកបានបន្ថែមថា ជាក់ស្តែងក្នុងឆ្នាំ ២០២៥នេះ ធនាគារ អ៊ឹមប៊ី (ខេមបូឌា) បានចូលរួមក្នុងសន្និសីទតភ្ជាប់រវាងធុរកិច្ចវៀតណាម-កម្ពុជា និងទទួលបានពានរង្វាន់ «ធនាគារ​បុគ្គលកម្រិតមធ្យមក្នុងស្រុកប្រចាំប្រទេសកម្ពុជា» ដែលនេះបង្ហាញពីភាពប្រាកដប្រជាក្នុងការប្តេជ្ញាចិត្តដើម្បីភាពរីកចម្រើនខ្ពស់ និងបង្កើនផលវិជ្ជមានក្នុងតំបន់, លោកក៏បានលើកឡើងផងដែរថា ប្រៀបធៀបជាមួយនឹងសេវាផ្ទេរប្រាក់ដែលអតិថិជនធ្លាប់ប្រើប្រាស់កន្លងមក យើងជឿជាក់ថាការផ្តល់ជូនពិសេសនេះ នឹងរួមចំណែកក្នុងការសន្សំសំចៃបន្ថែមទៀតដល់អតិថិជនរបស់យើង។

អតិថិជនអាចទាញយកកម្មវិធី MBCambodia My Bank App និងចុះឈ្មោះប្រើប្រាស់ ជាមួយជំហានងាយៗ បានគ្រប់ពេលវេលា គ្រប់ទីកន្លែង។ សម្រាប់ជំនួយបន្ថែមអតិថិជនអាចអញ្ជើញទៅកាន់សាខា ធនាគារ អ៊ឹមប៊ី (ខេមបូឌា) ណាមួយដែលនៅជិតបំផុត ឬទាក់ទងមកកាន់លេខទូរសព្ទ ០២៣ ៩៦៨ ៦៨៦។

សូមបញ្ជាក់ថា ធនាគារ អ៊ឹមប៊ី (ខេមបូឌា) គឺជាបុត្រសម្ព័ន្ធរបស់ អ៊ឹមប៊ី គ្រុប ដែលជាស្ថាប័នហិរញ្ញវត្ថុឈានមុខគេមួយនៅវៀតណាម និងមានបទពិសោធន៍ជាង ៣០ ឆ្នាំមកហើយ។ ធនាគារ អ៊ឹមប៊ី (ខេមបូឌា) ត្រូវបានបើកដំណើរការជាធនាគារពាណិជ្ជជាផ្លូវការដោយទទួលបានអាជ្ញាប័ណ្ណពីធនាគារជាតិនៃកម្ពុជាក្នុងខែធ្នូ ឆ្នាំ ២០២២ បន្ទាប់ពីប្រតិបត្តិការជាសាខារបស់ធនាគារអាណាព្យាបាល (Military Commercial Joint Stock Bank) នៅកម្ពុជា ចាប់តាំងពីឆ្នាំ ២០១១។

តាមរយៈមូលដ្ឋានគ្រឹះដ៏រឹងមាំក្នុងទីផ្សារកម្ពុជា អស់រយៈពេលជាងមួយទសវត្សរ៍កន្លងមក ធនាគារ អ៊ឹមប៊ី (ខេមបូឌា) កំពុងនឹងបោះជំហានទៅមុខយ៉ាងសំខាន់ក្នុងការប្រែក្លាយខ្លួនទៅជាធនាគារឌីជីថលដ៏ទំនើប ដោយផ្តោតលើអត្ថប្រយោជន៍អតិថិជនជាចម្បងសម្រាប់រាល់ការធ្វើទំនើបកម្មលើផលិតផល និងសេវាកម្មនានារបស់ខ្លួន។ ជាមួយនឹងមូលដ្ឋានគ្រឹះក្រោមការវិនិយោគដ៏សំខាន់ពីអ៊ឹមប៊ី គ្រុប, ធនាគារ អ៊ឹមប៊ី (ខេមបូឌា) មានបំណងរួមចំណែកលើការជម្រុញបន្ថែមនូវគុណវុឌ្ឍិក្នុងវិស័យធនាគារកម្ពុជា តាមរយៈការផ្តោតលើតម្រូវការអតិថិជន និងសេវាឌីជីថលជាអាទិភាព។ ធនាគារ អ៊ឹមប៊ី (ខេមបូឌា) ផ្ដល់ជូននូវដំណោះស្រាយសេវាហិរញ្ញវត្ថុដ៏សម្បូរបែប ជាមួយនឹងសុវត្ថិភាពខ្ពស់ ទំនុកចិត្តខ្ពស់ និងភាពងាយស្រួលសម្រាប់អតិថិជនទាំងអស់ ទាំងលក្ខណៈបុគ្គល និងសហគ្រាស៕