(ភ្នំពេញ)៖ គណៈកម្មាធិការជាតិអូឡាំពិកកម្ពុជា(NOCC) បានសម្រេចពន្យាពេលរៀបចំព្រឹត្តិការណ៍ទិវារត់ប្រណាំងម៉ារ៉ាតុងចក្រភពអង្គរ (Angkor Empire Marathon) លើកទី១០ ដែលគ្រោងរៀបចំនាថ្ងៃទី៣ ខែសីហាដដែល រហូតដល់មានការជូនដំណឹងកាលបរិច្ឆេទថ្មី នាពេលក្រោយ។

ប្រភពដដែល បានបញ្ជាក់ជូនអ្នករត់ជាតិ និងអន្ដរជាតិ នៅថ្ងៃទី២៩ ខែកក្កដានេះថា «ដោយសារមានការសូមសំណូមពរពីមតិមហាជនជាច្រើន បានសូមឲ្យលើកពេលមួយរយៈសិន ដោយសារស្ថានការណ៍មិនទាន់មានភាពច្បាស់លាស់នៅឡើយ ។ ដូចនេះ ក្នុងនាមគណៈកម្មាធិការជាតិអូឡាំពិកកម្ពុជា និងគណៈកម្មការរៀបចំព្រឹត្តិការណ៍រត់ប្រណាំងចក្រភពអង្គរ លើកទី១០ ត្រូវពន្យាពេលជាផ្លូវការ និងជូនដំណឹងកាលបរិច្ឆេទនាពេលក្រោយ»។

លោក វ៉ាត់ ចំរើន អគ្គលេខាធិការ NOCC បានឲ្យដឹងដែលថា អត្តពលិកប្រមាណជាង ៤ពាន់នាក់ បានចុះឈ្មោះចូលរួមព្រឹត្តិការណ៍ Angkor Empire Marathon ក្នុងនោះមានមតិអ្នករត់ជាតិ និងអន្ដរជាតិភាគច្រើន ស្នើឲ្យពន្យាពេលរៀបចំ។ ដូច្នេះក្នុងនាមគណៈកម្មការរៀបចំ បានសូមការអភ័សទោស ចំពោះការជូនដំណឹងបន្ទាន់ កាលពីព្រឹកមិញ ដ្បិតមានសំណូមពរមួយចំនួន ក្រោយឃើញស្ថានការល្អប្រសើរ។ ហេតុនេះ លោកសង្ឃឹមថា អ្នករត់ជាតិ-អន្ដរជាតិ នឹងអធ្យាស្រ័យ ហើយត្រៀមចូលរួមឲ្យបានច្រើនកុះករ នៅពេលវេលាស័ក្ដិសមដែលគណៈកម្មការនឹងជូនដំណឹងពីការរៀបចំឡើងវិញ៕