(ភ្នំពេញ)៖ ក្នុងស្មារតី ««ខ្មែរស្រឡាញ់ខ្មែរ» ក្រុមហ៊ុនរថយន្ត JMC ដែលកំពុងប្រតិបត្តិការលក់រថយន្តនៅកម្ពុជា បានបង្ហាញការចូលរួមចំណែករបស់ខ្លួន ដើម្បីសម្រាលទុក្ខលំបាករបស់បងប្អូនភៀសសឹក តាមរយៈការនាំយកនូវស្បៀងអាហារមួយចំនួន ទៅជូនជនបងប្អូនជនភៀសសឹក នៅស្រុកវាលវែង ខេត្តពោធិ៍សាត់។

ស្បៀងអាហារចាំបាច់ទាំងនោះ ត្រូវបានក្រុមការងាររបស់ក្រុមហ៊ុនដឹកតាមរថយន្ត Pick Up JMC Grand Avenue ៣គ្រឿងរបស់ JMC ធ្វើដំណើរពីរាជធានីភ្នំពេញ នៅថ្ងៃទី២៧ ខែកក្កដា​ ឆ្នាំ២០២៥ ប្រគល់ជូនរដ្ឋបាលស្រុកវាលវែង ដែលមានលោក ធាង ឡេង អភិបាល នៃគណៈអភិបាលស្រុក ចាំទទួល ដើម្បីចែកជូនបន្តដល់បងប្អូនជនភៀសសឹកដែលកំពុងជួបការលំបាក។

ក្នុងឱកាសនោះ ក្រុមការងារបានទស្សនា និងស្វែងយល់អំពីការរស់នៅរបស់បងប្អូនជនភៀសសឹក និងមានអារម្មណ៍សប្បាយ ពេលឃើញបងប្អូនប្រជាពលរដ្ឋរបស់យើងមានសុវត្ថិភាព។

បន្ទាប់ពីបានប្រគល់ស្បៀង និងសម្ភាររួចក្រុមការងាររបស់ក្រុមហ៊ុន JMC បានត្រឡប់មកដល់ភ្នំពេញវិញ នៅល្ងាចថ្ងៃដដែល។

សូមជម្រាបថា JMC Group(JMCG) បានបង្កើតឡើងក្នុងឆ្នាំ ១៩៤៧ គឺជាក្រុមហ៊ុនរថយន្តមួយ ដែលរួមមានការអភិវឌ្ឍន៍ផលិតផល ការផលិត និងការលក់។ JMCG គឺជាក្រុមហ៊ុនរថយន្តពាណិជ្ជកម្មតែមួយគត់ ដែលបង្កើតក្រុមហ៊ុនបណ្តាក់ទុនរួមគ្នាជាមួយសហគ្រាសចំនួនបីនៃក្រុមហ៊ុន Fortune Global 500 ក្នុងប្រទេសចិន។

លើសពីនេះ ក្នុងឆ្នាំ២០២០ ការលក់យានយន្តរបស់សហគ្រាសJMC Group មានចំនួន ៣៨១.០០០ គ្រឿង កើនឡើង ១១.៧% ពីមួយឆ្នាំទៅមួយឆ្នាំ ហើយប្រាក់ចំណូលប្រតិបត្តិការមានចំនួន ៩៥.៣៣៦ ពាន់លានយន់ កើនឡើង ៧% ពីមួយឆ្នាំទៅមួយឆ្នាំ។ ក្រៅពីនេះក្រុមហ៊ុនមាននិយោជិតរហូតដល់ទៅ ៣៧,០០០នាក់៕