(បរទេស)៖ ក្រុមហ៊ុន Nvidia ត្រូវបានគេរាយការណ៍មកថា បានបញ្ជាទិញ បន្ទះឈីប H20 ចំនួន ៣០ម៉ឺនគ្រឿង ពីក្រុមហ៊ុនផលិតកិច្ចសន្យា TSMC កាលពីសប្តាហ៍មុន ដោយសារតម្រូវការខ្ពស់ពីប្រទេសចិន។ ការផ្លាស់ប្តូរនេះកើតឡើងបន្ទាប់ពីរដ្ឋបាលលោក ត្រាំ បានអនុញ្ញាតឱ្យ Nvidia បន្តលក់ បន្ទះឈីបក្រាហ្វិក (GPUs) H20 ទៅកាន់ប្រទេសចិនឡើងវិញ ដោយច្រានចោលការហាមឃាត់ដែលបានដាក់កាលពីខែមេសា។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី២៩ ខែកក្កដា ឆ្នាំ២០២៥។

បន្ទះឈីប H20 ត្រូវបានបង្កើតឡើងជាពិសេសសម្រាប់ទីផ្សារចិន បន្ទាប់ពីមានការរឹតបន្តឹងការនាំចេញរបស់សហរដ្ឋអាមេរិកទៅលើបន្ទះឈីប AI ផ្សេងទៀតរបស់ Nvidia កាលពីចុងឆ្នាំ ២០២៣។ ទោះបីជា H20 មិនមានថាមពលកុំព្យូទ័រខ្លាំងដូច H100 ឬស៊េរី Blackwell ថ្មីរបស់ Nvidia ក៏ដោយ ក៏តម្រូវការនៅតែមានកម្រិតខ្ពស់។ ការបញ្ជាទិញថ្មីនេះនឹងបន្ថែមទៅលើស្តុក H20 ដែលមានស្រាប់ប្រមាណ ៦០ម៉ឺន ទៅ ៧០ម៉ឺនគ្រឿង។

គួរជម្រាបថា លោក Jensen Huang នាយកប្រតិបត្តិ (CEO) ក្រុមហ៊ុន Nvidia បានថ្លែងក្នុងអំឡុងពេលធ្វើដំណើរទៅកាន់ទីក្រុងប៉េកាំងនៅខែនេះថា ការផលិត H20 នឹងចាប់ផ្តើមឡើងវិញប្រសិនបើមានការបញ្ជាទិញគ្រប់គ្រាន់ ដោយការចាប់ផ្តើមខ្សែសង្វាក់ផ្គត់ផ្គង់ឡើងវិញនឹងចំណាយពេល ៩ ខែ។ ទោះជាយ៉ាងណាក៏ដោយ Nvidia នៅតែត្រូវការ អាជ្ញាប័ណ្ណនាំចេញ ពីអាជ្ញាធរសហរដ្ឋអាមេរិកដើម្បីដឹកជញ្ជូនបន្ទះឈីបទាំងនេះ៕