(មេនឆេស្ទើ)៖ ក្រុមមេឃខៀវ Manchester City បានទិញកីឡាករចាស់របស់ពួកគេត្រឡប់មកវិញគឺ James Trafford ពីក្លិប Burnley ក្នុងតម្លៃសរុបដែលត្រូវបានគេរាយការណ៍ថា ២៧លានផោន។ នេះបើយោងតាមការចេញផ្សាយដោយ BBC។

តែយ៉ាងណាប្រភពពីក្លិប Burnley បានបញ្ជាក់ថា មានតម្លៃរហូតដល់ទៅ ៣១លានផោនឯណោះ ថ្លៃជាងគេក្នុងនាមអ្នកចាំទីណាៗទាំងអស់ បើធៀបនឹងអ្នកចាំទីផ្សេងទៀតរបស់អង់គ្លេស បំបែកកំណត់ត្រាចាស់របស់អ្នកចាំទី Jordan Pickford ដែលក្លិប Everton ទិញពីឆ្មាខ្មៅ Sunderland នាអំឡុងឆ្នាំ២០១៧ ក្នុងតម្លៃ ៣០លានផោន។

Trafford វ័យទើបតែ ២២ឆ្នាំ ជាអតីតកីឡាករចេញពីថ្នាលយុវជនរបស់ City ត្រូវបានលក់ចេញទៅឱ្យ Burnley កាលខែកក្កដា ឆ្នាំ២០២៣ ក្នុងតម្លៃត្រឹមតែ ១៩លានផោនតែប៉ុណ្ណោះ ដោយចូលលេងសរុបបានចំនួន ៧៣ប្រកួត ក្នុងនោះដែរបានលេង ២៨ប្រកួតក្នុងលីគ Premier League នារដូវកាលឆ្នាំ២០២៣-២៤។

ការវិលមកកាន់កីឡដ្ឋាន Etihad ជាថ្មីនេះ Trafford បានព្រមព្រៀងចុះកិច្ចសន្យារយៈពេល ៥ឆ្នាំ ជាមួយជម្រើសថែមបាន ១២ខែទៀតដែរ ដោយនឹងពាក់លេខ១ នៅ Man City។ រូបគេត្រូវប្រជែងយកតំណែងលេខ១ ពីអ្នកចាំទី Ederson ស្របពេលកីឡាករជើងចាស់ប្រេស៊ីលរូបនេះ កាន់កាប់តំណែងនេះ ៨ឆ្នាំមកហើយ៕