(ភ្នំពេញ)៖ ក្រសួងអប់រំ យុវជន និងកីឡា និងមជ្ឈមណ្ឌលជំរុញធុរកិច្ចអន្តរជាតិរបស់ប្រទេសមីយ៉ាន់ម៉ា បានបន្ដពង្រឹងទំនាក់ទំនងលើកិច្ចសហប្រតិបត្តិការវិស័យកីឡា ដើម្បីឈានទៅរកផ្លែផ្កាកាន់តែល្អប្រសើរ សម្រាប់វិស័យកីឡាប្រទេសទាំងពីរ នាថ្ងៃអនាគត។

នេះបើតាមការលើកឡើងរបស់លោក វ៉ាត់ ចំរើន រដ្ឋលេខាធិការ តំណាងដ៍ខ្ពង់ខ្ពស់លោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បន្ទាប់ពីអនុញ្ញាតឲ្យលោក Aik Htun ប្រធានមជ្ឈមណ្ឌលជំរុញធុរកិច្ចអន្តរជាតិរបស់ប្រទេសមីយ៉ាន់ម៉ា និងប្រតិភូ ចូលជួបសម្តែងការគួរសម និងពិភាក្សាការងារ កាលពីថ្ងៃទី២៩ ខែកក្កដាកន្លងទៅ នៅមជ្ឈមណ្ឌលជាតិហ្វឹកហ្វឺនកីឡា។

លោក វ៉ាត់ ចំរើន បានគូសបញ្ជាក់ថា ជំនួបខាងលើ ផ្ដោតលើទំនាក់ទំនងធុរកិច្ចលើវិស័យកីឡា និងការផ្លាស់ប្ដូរគ្នា រវាងវិស័យកីឡាកម្ពុជា និងមីយ៉ាន់ម៉ា ហើយក៏ជាការរឹតចំណងមិត្តភាពរវាងប្រទេសទាំងពីរ ដ្បិតកន្លងមក ភាគីទាំងពីរ បានខិតខំធ្វើទំនាក់ទំនងទៅវិញទៅមក លើគ្រប់វេទិកាកីឡាអន្ដរជាតិ និងចលនាអូឡាំពិកជាដើម។

ដើម្បីធានាបាននូវកិច្ចសហប្រតិបត្តិការរឹងមាំ ភាគីមីយ៉ាន់ម៉ា បានស្នើកិច្ចសហការរៀបចំការប្រកួតមិត្តភាពមួយ នាពេលខាងមុខ ដោយផ្ដើមពីកីឡាវាយកូនឃ្លីលើតុ ក្នុងគោលបំណងជំរុញឲ្យយុវជនបានផ្លាស់ប្ដូរបច្ចេកទេស ក៏ដូចជាការទទួលបដិសណ្ឋារកិច្ច ហើយកម្ពុជាក៏រីករាយក្នុងការពិនិត្យ និងពិភាក្សាដើម្បីរៀបចំការងារនេះ។ លើសពីនេះ ភាគីទាំងពីរ ក៏នឹងពិនិត្យលើកិច្ចការឧស្សាហកម្មកីឡា និងធុរកិច្ចកីឡាផ្សេងៗទៀតផង។

រដ្ឋលេខាធិការក្រសួងអប់រំដដែលបន្ដថា «នេះគឺជាពេលវេលាមួយ សម្រាប់វិស័យកីឡាប្រទេសទាំងពីរ ដែលអាចក្លាយទៅជាជំហាន នៃការពង្រឹងកិច្ចសហប្រតិបត្តិការលើវិស័យកីឡា ទៅថ្ងៃអនាគតមួយដ៏ល្អប្រសើរ។ យើងត្រៀមលក្ខណៈក្នុងការចូលរួមនេះ ហើយកម្ពុជា ជាគោលការណ៍របស់រាជរដ្ឋាភិបាល និងក្រសួងអប់រំ គឺពង្រីកកិច្ចសហប្រតិបត្តិការគ្រប់វិស័យ ពិសេសវិស័យកីឡារបស់យើងឲ្យទូលំលាយ ហើយឈានទៅដល់កិច្ចសហប្រតិបត្តិការស៊ីជម្រៅទ្វេភាគីជាមួយបណ្ដាប្រទេសទាំងអស់ ពិសេសប្រទេសនៅអាស៊ានរបស់យើង»។

«ជាគោលការណ៍របស់អាស៊ាន យើងនឹងអាចធ្វើកិច្ចសហប្រតិបត្តិការនេះ ហើយយើងបានធ្វើការទំនាក់ទំនង និងកិច្ចសហប្រតិបត្តិការនេះ ដោយអគ្គនាយកកីឡា នៃក្រសួងអប់រំ យុវជន និងកីឡារបស់យើង ជាមួយប្រតិភូដែលបានមកទស្សនកិច្ចស្វែងយល់ និងចាប់ដៃគ្នាជាមួយវិស័យកីឡារបស់យើង ។ យើងសង្ឃឹមថា កិច្ចសហប្រតិបត្តិការនេះ នឹងឈានទៅដល់ជាផ្លែផ្កាមួយដ៏ល្អប្រសើរនាពេលឆាប់ៗនេះ»។ លោក វ៉ាត់ ចំរើន បន្ថែម។

ទន្ទឹមជាមួយលោក Aik Htun បានថ្លែងកោតសរសើរ និងវាយតម្លៃខ្ពស់ ចំពោះភាពរីកចម្រើននៃវិស័យកីឡាកម្ពុជា ។ អ្វីដែលពិសេស គឺប្រធានសភាពាណិជ្ជកម្មមីយ៉ាន់ម៉ាដដែល នៅតែកោតស្ញប់ស្ញែងនូវភាពជោគជ័យដ៏អស្ចារ្យ នៃព្រឹត្តិការណ៍ស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ នៅកម្ពុជា ដែលជាករណីដ៏ពិសេសមួយ និងក្លាយជាភាពវិជ្ជមានមួយ សម្រាប់អនាគត ក្នុងការរៀបចំ កសាង និងអភិវឌ្ឍន៍វិស័យកីឡាកម្ពុជា៕