(បរទេស)៖ អូស្ត្រាលីបានសម្រេចបញ្ចូលកម្មវិធី YouTube មួយទៀត ចូលក្នុងបញ្ជីហាមឃាតចំពោះកុមារ និងយុវជនអាយុក្រោម ១៦ ដែលនឹងចូលជាធរមាននៅខែធ្នូ ឆ្នាំ២០២៥។ កន្លងទៅ YouTube ត្រូវបានលើកលែង ដោយចាត់ទុកថាជាកម្មវិធីសម្រាប់ឲ្យយុវជនសិក្សាបន្ថែម ប៉ុន្តែបច្ចុប្បន្ននេះ បានផ្ទៀងផ្ទាត់ថា វាមានមាតិកាគ្រោះថ្នាក់ដល់កុមារ ដូចជាបណ្តាញសង្គមដទៃទៀតអ៉ីចឹងដែរ។ នេះបើតាមការចេញផ្សាយដោយសារព័ត៌មាន Reuters នៅថ្ងៃទី៣០ ខែកក្កដា ឆ្នាំ២០២៥។

តាមរបាយការណ៍របស់គណៈកម្មាធិការជាតិាអុីនធឺណិត (eSafety Commissioner) បានបង្ហាញថា មាន៣៧% នៃកុមារអូស្ត្រាលីបានជួបប្រទះមាតិកាគ្រោះថ្នាក់នៅលើ YouTube ដែលខ្ពស់ជាងបណ្តាញផ្សេងៗទៀត។ គេជឿថា algorithm របស់ YouTube, autoplay, និងការបញ្ចេញមតិអាចបង្កឱ្យកុមារ ជួបការរិះគន់ មានបញ្ហាផ្លូវអារម្មណ៍ និងមានការបំពាននានាតាមអ៊ីនធឺណិត។ ដូច្នេះចាប់ពីខែធ្នូ ឆ្នាំ២០២៥, កុមារ និងយុវជនអាយុ ក្រោម១៦ឆ្នាំ នឹងមិនអនុញ្ញាតឱ្យបង្កើតឬប្រើគណនី YouTube ទៀតឡើយ។ ពួកគេនៅតែអាចមើលវីដេអូបាន (ដោយមិនបង្កើតគណនី) ប៉ុន្តែមិនអាចបញ្ចេញមតិ បង្ហោះវីដេអូ ឬទទួលបានវីដេអូដែល system ផ្ដល់ដោយផ្ទាល់តាមចំណង់ចំណូលចិត្តនោះទេ។ ក្រុមហ៊ុនបណ្តាញសង្គមណាមួយដែលមិនអនុវត្តច្បាប់ អាចរងនូវទោសពិន័យរហូតដល់ ៤៩.៥លានដុល្លារ​អូស្ត្រាលី។ តែឪពុកម្តាយ ឬកុមារ មិនរងការផាកពិន័យឡើយ។

ជាការឆ្លើយតបពី Meta, TikTok, និង Snapchat បានប្រកាសថា ការលើកលែង YouTube ជាជម្រើសមិនសមរម្យ និងបង្កការរើសអើង។ TikTok បញ្ជាក់ថា វាគឺដូចជា «ហាមលក់ស្រា ប៉ុន្តែអនុញ្ញាត Coca-Cola»។ YouTube ប្រកាសថាវាជាវេទិកាវីដេអូ មិនមែនជាបណ្តាញសង្គមទេ ហើយពោរពេញដោយមាតិកាសិក្សា។ YouTube កំពុងពិចារណាច្បាប់ប្រឆាំងនឹងការសម្រេចនេះ។

គួរជម្រាបថា បញ្ជីវេទិកាដែលអូស្ត្រាលីហាមឃាតចំពោះកុមារ និងយុវជនក្រោមអាយុ១៦ឆ្នាំរួមមាន៖ Facebook / Instagram, TikTok, X, Reddit និងចុងក្រោយ YouTube ចាប់ពីធ្នូ ឆ្នាំ២០២៥៕