(ភ្នំពេញ)៖ សហព័ន្ធកីឡាប្រដាល់គុនខ្មែរ បានធ្វើការជូនដំណឹងដល់ម្ចាស់ស្ថានីយ៍ទូរទស្សន៍ និងក្រុមហ៊ុនដៃគូអភិវឌ្ឍន៍ទាំងអស់ ក្នុងការសម្រេចផ្អាករៀបចំការប្រកួតកីឡាប្រដាល់គុនខ្មែរ ជាបណ្ដោះអាសន្ន រហូតដល់មានការជូនដំណឹងជាថ្មី ដោយផ្អែកលើសភាពការណ៍បច្ចុប្បន្ន។

យោងតាមសេចក្ដីជូនដំណឹងខាងលើ បានបញ្ជាក់ថា «យោងតាមសភាពការណ៍បច្ចុប្បន្ន សហព័ន្ធស្នើសុំផ្អាករាល់ការប្រកួតកីឡាប្រកួតកីឡាប្រដាល់គុនខ្មែរ នៅគ្រប់ស្ថានីយ៍ទូរទស្សន៍ និងសង្វៀននានា តាមបណ្ដាលខេត្ត ក្រោមការគ្រប់គ្រងរបស់សហព័ន្ធកីឡាប្រដាល់គុនខ្មែរ ចាប់ពីពេលនេះតទៅ រហូតដល់មានការជូនដំណឹងជាថ្មី»។

ទន្ទឹមជាមួយការជូនដំណឹងអំពីការផ្អាកសកម្មភាពប្រកួតកីឡាប្រដាល់គុនខ្មែរជាបណ្ដោះអាសន្ននេះ សហព័ន្ធសង្ឃឹមថា ម្ចាស់ស្ថានីយ៍ទូរទស្សន៍ និងក្រុមហ៊ុនដៃគូអភិវឌ្ឍន៍ទាំងអស់ នឹងចូលរួមអនុវត្តដោយស្មារតីទទួលខុសត្រូវខ្ពស់។

គួរដឹងថា ការសម្រេចផ្អាកការប្រកួតកីឡាប្រដាល់គុនខ្មែរនេះ ស្របពេលសភាពការណ៍ព្រំដែនកម្ពុជា-ថៃ ទើបបានស្ងប់ស្ងាត់ បន្ទាប់ពីបទឈប់បាញ់ ដោយឥតលក្ខខណ្ឌ នៃរដ្ឋាភិបាលកម្ពុជា-ថៃ បានឯកភាពគ្នា ក្នុងកិច្ចប្រជុំបន្ទាន់នៅប្រទេសម៉ាឡេស៊ី ហើយបានចូលជាធរមាន កាលពីម៉ោង ១២៖០០នាទីយប់ថ្ងៃទី២៨ ខែកក្កដា ឆ្នាំ២០២៥ កន្លងទៅ៕