(ភ្នំពេញ)៖ ថ្នាក់ដឹកនាំក្រុមហ៊ុន «GANZBERG» ចុះចែកអំណោយដោយផ្ទាល់ដល់ជនភៀសសឹក និងវីរៈកងទ័ព នៅខេត្តឧត្តរមានជ័យ, ព្រះវិហារ, សៀមរាប និងបាត់ដំបង កាលពីពេលថ្មីៗកន្លងទៅ។

ពិតជាគួរឲ្យកោតសរសើរក្រុមហ៊ុន «GANZBERG» បានចុះទៅជុំរុំផ្ទាល់ មានដូចជាខេត្តឧត្តរមានជ័យ, ព្រះវិហារ, សៀមរាប និងបាត់ដំបង ចែកអំណោយ និងសម្ភារៈចាំបាច់នានាជូនដល់បងប្អូន ជនភៀសសឹក និងវីរៈកងទ័ព ​ក្នុងនោះរួមមានអង្ករសរុប ២២០តោន, កន្ទេល ១០,០០០, ភួយ ១០,០០០ និងភេសជ្ជៈ ៦,០០០កេស​ ដើម្បីបន្តផ្តល់កំលាំងចិត្តដល់បងប្អូនប្រជាពលរដ្ឋកម្ពុជា ក៏ដូចជាវីរកងទ័ពជួរមុខកម្ពុជា។​ នេះគឺពិតជាគួរឲ្យកោតសរសើរ ដល់ក្រុមហ៊ុន GANZBERG ជាខ្លាំង សម្រាប់ទឹកចិត្តសប្បុរសដ៏ប្រពៃមួយនេះ។​

សូមបញ្ជាក់ថា ក្រុមហ៊ុន «GANZBERG» ក៏បានចូលរួមឧបត្ថម្ភថវិកា ១,០០០,០០០ដុល្លារ (១លានដុល្លារ) ដល់រាជរដ្ឋាភិបាលកម្ពុជា ក្នុងការរួមចំណែកជួយលើកទឹកចិត្ត ដល់កងទ័ពកម្ពុជា ដ៏អង់អាចក្លាហានរបស់កម្ពុជា ដែលកំពុងឈរជើងជាប់ជាប្រចាំ ដើម្បីការពារបូរណភាពទឹកដី នៅតាមបណ្តោយព្រំដែនកម្ពុជា-ថៃ។ ក្រុមហ៊ុន «GANZBERG» តែងតែយកចិត្តដាក់លើកិច្ចការងារសង្គម មនុស្សធម៌គ្រប់ពេល ដែលប្រជាជនកម្ពុជាកំពុងជួបនូវទុក្ខលំបាក។

ឆ្លៀតក្នុងឱកាសនេះដែរ ក្រុមហ៊ុន «GANZBERG» សូមបួងសួងដល់ទេវតារក្សាទឹកដីនៃព្រះរាជាណាចក្រកម្ពុជា បុព្វបុរសខ្មែរគ្រប់ព្រះអង្គ និងវត្ថុស័ក្តិសិទ្ធិក្នុងលោក សូមតាមថែរក្សាការពារកងទ័ពកម្ពុជារបស់យើង ឱ្យជួបប្រទះតែសេចក្តីសុខ ជៀសផុតពីជំងឺដង្កាត់ទាំងឡាយ ហើយឈ្នះអស់ខ្មាំងសត្រូវ៕