(បរទេស)៖ អាជ្ញាធរ​ប្រឆាំង​ការ​ប្រកួតប្រជែង​របស់​ប្រទេស​អ៊ីតាលីនៅ​ថ្ងៃ​ពុធនេះ ​បាន​ប្រកាស​បើក​ការ​ស៊ើបអង្កេត​លើ​ក្រុមហ៊ុន Meta Platforms។ នេះ​កើតឡើង​បន្ទាប់ពី​មាន​ការ​ចោទប្រកាន់​ថា Meta បាន​រំលោភបំពាន​ទីតាំង​លេចធ្លោ​របស់​ខ្លួន ដោយ​បាន​បញ្ចូល​ឧបករណ៍បញ្ញាសិប្បនិម្មិត្ត AI របស់​ខ្លួន​ទៅក្នុង​កម្មវិធីផ្ញើសារ WhatsApp។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី៣០ ខែកក្កដា ឆ្នាំ២០២៥។

អាជ្ញាធរ​បាន​បញ្ជាក់​ថា Meta ប្រហែលជា​បាន​បំពាន​ច្បាប់​ប្រកួតប្រជែង​របស់​សហភាព​អឺរ៉ុប ដោយសារ​ការ​បញ្ចូល​ជំនួយការ Meta AI របស់ខ្លួនទៅក្នុង WhatsApp ដោយ​គ្មាន​ការ​យល់ព្រម​ពី​អ្នកប្រើប្រាស់ ដែលជាទង្វើដែល​អាច​ប៉ះពាល់​ដល់​ដៃគូ​ប្រកួតប្រជែង។

តែយ៉ាងណា Meta បាន​អះអាង​ថា ខ្លួន​កំពុង​សហការ​ជាមួយ​អាជ្ញាធរដែលមានមូលដ្ឋាននៅទីក្រុងរ៉ូម ហើយ​ថា​សេវាកម្ម AI របស់​ខ្លួនបានផ្តល់អត្ថប្រយោជន៍​ដល់​អតិថិជន។ ទន្ទឹមគ្នានេះ អ្នក​នាំពាក្យ​ម្នាក់​បាន​ថ្លែង​ថា «ការ​ផ្ដល់​សិទ្ធិ​ប្រើប្រាស់​មុខងារ AI ដោយ​ឥត​គិតថ្លៃ​ក្នុង WhatsApp ផ្ដល់​ជម្រើស​ដល់​ប្រជាជន​អ៊ីតាលី​រាប់​លាន​នាក់​ក្នុង​ការ​ប្រើប្រាស់ AI ក្នុង​កម្មវិធី​ដែល​ពួកគេ​ស្គាល់​រួច​ហើយ»។

អាជ្ញាធរ​អ៊ីតាលី (AGCM) បាន​ឱ្យ​ដឹង​ថា Meta AI ដែល​ផ្ដល់​ការ​ឆ្លើយតប​បែប chatbot ត្រូវ​បាន​បញ្ចូល​ទៅក្នុង​ចំណុច​ប្រទាក់ WhatsApp តាំងពី​ខែ​មីនា ឆ្នាំ២០២៥ មកម្ល៉េះ។ និយតករ​មានការ​បារម្ភ​ថា ការ​ដាក់បញ្ចូល​នេះ​អាច​នាំ​អ្នកប្រើប្រាស់​ទៅរក​សេវាកម្ម AI របស់ Meta ដោយ​អយុត្តិធម៌ ដែល​អាច​បង្ក​គ្រោះថ្នាក់​ដល់​ដៃគូ​ប្រកួតប្រជែង និង​បង្ខាំង​អ្នកប្រើប្រាស់​ឱ្យ​នៅ​តែ​ក្នុង​វេទិកា​របស់ Meta។

គួររំលឹកថា ក្រុមហ៊ុន​ណា​ដែល​បំពាន​ច្បាប់​ប្រកួតប្រជែង​របស់​សហភាព​អឺរ៉ុប​ដោយ​រំលោភបំពាន​ទីតាំង​លេចធ្លោ អាច​ត្រូវ​ពិន័យ​រហូត​ដល់ ១០% នៃ​ប្រាក់​ចំណូល​សរុប​ទូទាំង​ពិភពលោក។ ​អាជ្ញាធរ​បាន​ធ្វើការ​ស៊ើបអង្កេត​នៅ​ការិយាល័យ​សាខា​អ៊ីតាលី​របស់ Meta ដោយ​មាន​ជំនួយ​ពី​ប៉ូលីស​ពន្ធដារ​អ៊ីតាលី៕