(ភ្នំពេញ)៖ មុននេះបន្តិចយើងបានឃើញនូវសកម្មភាពគួរឱ្យរំភើប របស់អតីតយោធិនពិការពីរនាក់ នៅកន្លែងទទួលមូលនិធិជនភៀសសឹក ដែលផ្តួចផ្តើម ដោយអ្នកឧកញ៉ា គិត ម៉េង និងលោកជំទាវអ្នកឧកញ៉ា ម៉ៅ ចំណាន ដែលមានទីតាំងស្ថិតនៅចំណតរថយន្ត រ៉ូយ៉ាល់ វ័ន របស់ធនាគារ វីង។

ក្រុមគ្រួសារជាច្រើននៅតាមបណ្តោយព្រំដែន ត្រូវបានបង្ខំចិត្តជម្លៀសខ្លួនចេញពីផ្ទះសម្បែង កុមារតូចៗត្រូវបាន​ផ្លាស់ទីលំនៅ ជីវិតត្រូវបានប្រែប្រួលទាំងស្រុង។ ប៉ុន្តែអ្វីដែលគួរឱ្យចាប់អារម្មណ៍នៅក្នុងកាលៈទេសៈដ៏សោកសៅនេះ យើងបានឃើញពីទឹកចិត្តរបស់ពលរដ្ឋខ្មែរ ដែលបានរួមគ្នាតស៊ូ ប្តូរផ្តាច់ដើម្បីជាតិមាតុភូមិ។

យោធិនទាំងពីររូបនេះ បានប្តូរផ្តាច់ចំពោះជាតិមាតុភូមិ ហើយពួកគាត់បានពិការជើង ប៉ុន្តែពួកគាត់​នៅតែបន្ត​ចូលរួមផ្តល់​ជំនួយតាម​ដែលគាត់អាចធ្វើបាន នៅកន្លែងទទួលមូលនិធិជនភៀសសឹក​របស់យើង។

តំណាងមូលនិធិសូមអំពាវនាវដល់ប្រជាពលរដ្ឋខ្មែរគ្រប់រូប ទាំងក្នុង និងក្រៅប្រទេស ឱ្យមានភាពក្លាហានដូចពួកគាត់ ដើម្បីជួយចេញមុខតស៊ូប្រយុទ្ធ ប៉ុន្តែមិនមែន​ជាការប្រយុទ្ធដោយប្រើអាវុធ​នោះទេ វាជាការប្រយុទ្ធ​ដោយប្រើទឹក​ ចិត្តចូលរួមបរិច្ចាគដើម្បីគាំទ្រដល់ជនភៀសសឹក និងកងទ័ពជួរមុខ៕