(បរទេស)៖ ប្រទេសឥណ្ឌូណេស៊ី នឹងដំឡើងពន្ធលើការធ្វើប្រតិបត្តិការរូបិយប័ណ្ណគ្រីបតូ ជាមួយនឹងអត្រាខ្ពស់លើការជួញដូរដែលរៀបចំដោយផ្សារហ៊ុនក្រៅប្រទេស ដោយចាប់ផ្តើមពីថ្ងៃទី០១ ខែសីហា ឆ្នាំ២០២៥។ នេះបើយោងតាមបទប្បញ្ញត្តិថ្មីរបស់ក្រសួងហិរញ្ញវត្ថុឥណ្ឌូណេស៉ី និងត្រូវបានដកស្រង់ចេញផ្សាយដោយសារព័ត៌មាន Reuters នៅថ្ងៃទី៣០ ខែកក្កដា ឆ្នាំ២០២៥។

Crypto currencies បានក្លាយជាជម្រើសវិនិយោគដ៏ពេញនិយមនៅក្នុងប្រទេសដែលមានសេដ្ឋកិច្ចធំបំផុតនៅអាស៊ីអាគ្នេយ៍មួយនេះ ដែលត្រូវបានជួញដូរដោយស្របច្បាប់ ប៉ុន្តែមិនអាចប្រើជាមធ្យោបាយទូទាត់បានទេ។ រដ្ឋាភិបាលឥណ្ឌូណេស៊ី បានប្រកាសបង្កើនអត្រាពន្ធលើការធ្វើប្រតិបត្តិការមូលបត្រឌីជីថល ដើម្បីឆ្លើយតបនឹងកំណើនទីផ្សារ និងពង្រឹងការត្រួតពិនិត្យជាផ្លូវការ។ ក្នុងឆ្នាំ២០២៤ ប្រតិបត្តិការគ្រីបតូមានតម្លៃរហូតដល់ប្រហែល៤០ពាន់លាន ដោយមានអ្នកប្រើប្រាស់ជាង ២០លាននាក់ ច្រើនជាងអ្នកវិនិយោគក្នុងផ្សារភាគហ៊ុនក្នុងប្រទេសទៅទៀត។ ក្រោមបទប្បញ្ញត្តិថ្មី អ្នកជួយដូរគ្រីបតូនៅលើវេទិកាជួញដូរក្នុងស្រុក ត្រូវបង់ពន្ធអត្រា ០.២១% លើតម្លៃប្រតិបត្តិការ ដែលបានបង្កើនពី ០.១% កាលពីមុន។ ចំណែកអ្នកជួយដូរនៅលើវេទិកាជួញដូរបរទេស ត្រូវបង់អត្រាពន្ធ ១% ដែលកើនពី ០.២% កាលពីមុន។ ងាកមកអ្នកទិញវិញ នឹងមិនត្រូវបង់ពន្ធលើតម្លៃបន្ថែម (VAT) ទៀតឡើយ ខណៈក្រោមច្បាប់ចាស់ អ្នកទិញត្រូវបង់ VAT ក្នុងអត្រា ០.១១% ដល់ ០.២២%។

រដ្ឋាភិបាលឥណ្ឌូណេស៊ី ក៏បានបង្កើនអត្រា VAT លើសកម្មភាពជីកគ្រីបតូ (crypto mining) ទៅដល់ ២.២% ពីអត្រាចាស់ ១.១%។ ពន្ធចំណូលពិសេសអត្រា ០.១% លើការជីកគ្រីបតូត្រូវបានលុបចោល ដោយចាប់ពីឆ្នាំ២០២៦បន្តទៅទៀត ចំណូលពីការជីកគ្រីបតូនឹងត្រូវគេគណនា និងបង់ពន្ធតាមប្រភេទ ពន្ធចំណូលបុគ្គល ឬសារពើពន្ធសាជីវកម្ម។

ក្រុមហ៊ុន Tokocrypto ដែលគាំទ្រដោយ Binance បានថ្លែងថា ពួកគេចាប់អារម្មណ៍ និងស្វាគមន៍នូវការផ្លាស់ប្តូរនេះ ព្រោះវាបង្ហាញពីចក្ខុវិស័យថ្មីរបស់ឥណ្ឌូណេស៊ីក្នុងការបែងចែកបច្ចេកវិជ្ជាគ្រីបតូថាជា សម្បត្តិហិរញ្ញវត្ថុ (financial assets) មិនមែនជាទំនិញទៀតឡើយ។ ទោះជាយ៉ាងណា ពួកគេបានស្នើឲ្យមានរយៈពេលយ៉ាងហោចណាស់មួយខែ ដើម្បីឲ្យក្រុមហ៊ុនអាចធ្វើការកែសម្រួលប្រព័ន្ធនានា៕