(បរទេស)៖ ឆ្មាខ្មៅ Sunderland ដែលត្រៀមបង្ហាញខ្លួនក្នុងលីគកំពូលអង់គ្លេស Premier League ឡើងវិញនារដូវកាល ២០២៥-២៦ ទិញបានខ្សែបម្រើអន្តរជាតិស្វីស Granit Xhaka ពីក្លិប Bayer Leverkusen។ នេះបើយោងតាមការចេញផ្សាយដោយ BBC។

ជាបឋម Sunderland បានបង់ប្រាក់ប្រមាណ ១៣លានផោនទៅឱ្យក្លិបរបស់អាល្លឺម៉ង់ លេងនៅក្របខណ្ឌ Bundesliga ជាមួយនឹងប្រាក់បន្ថែម ៤លានផោនផ្សេងទៀតនាពេលក្រោយ។

Xhaka បានព្រមព្រៀងចុះកិច្ចសន្យារយៈពេល ៣ឆ្នាំ និងពាក់លេខ៣៤ផងដែរក្នុងក្លិបថ្មី Sunderland ដែលជាម្ចាស់កីឡដ្ឋាន Stadium of Light ក្រោយបានចូលរួមជាមួយ Leverkusen នាអំឡុងឆ្នាំ២០២៣ តាមរយៈផ្ទេរចេញពីកាំភ្លើងធំ Arsenal។

Xhaka បានឈ្នះពានរង្វាន់ FA Cup ជាមួយ Arsenal បាន ២លើកមុនពេលចាកចេញ ដែលការលេងនៅទឹកដីអាល្លឺម៉ង់ រូបគេក៏បានរួមចំណែកជួយ Leverkusen ធ្វើបានល្អបំផុតផងដែរនៃរដូវកាលទី១ របស់លោក ដោយបានឈ្នះពានលីគ Bundesliga តាមរយៈលេង ៣៨ប្រកួតមិនចាញ់ឡើយ ស្ថិតក្រោមការដឹកនាំរបស់អតីតគ្រូបង្វឹក លោក Xabi Alonso៕