(បរទេស)៖ ក្រុមហ៊ុនបច្ចេកវិទ្យាយក្ស Google គ្រោងនឹងវិនិយោគ ៦ ពាន់លានដុល្លារ ដើម្បីអភិវឌ្ឍមជ្ឈមណ្ឌលទិន្នន័យទំហំ ១ ជីហ្គាវ៉ាត់ និងហេដ្ឋារចនាសម្ព័ន្ធថាមពលរបស់ខ្លួន នៅរដ្ឋ Andhra Pradesh ភាគខាងត្បូងប្រទេសឥណ្ឌា។ នេះជាការវិនិយោគលើកដំបូងរបស់ក្រុមហ៊ុនមេ Alphabet នៅក្នុងប្រទេសឥណ្ឌា។ នេះបើយោងតាមប្រភពរដ្ឋាភិបាលឥណ្ឌា ដែលត្រូវបានចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី៣១ ខែកក្កដា ឆ្នាំ២០២៥។

មជ្ឈមណ្ឌលទិន្នន័យនេះ នឹងត្រូវសាងសង់នៅក្នុងទីក្រុងកំពង់ផែ Visakhapatnam ដែលក្នុងនោះរួមបញ្ចូលការវិនិយោគ ២ ពាន់លានដុល្លារ សម្រាប់សមត្ថភាពថាមពលកកើតឡើងវិញ ដើម្បីផ្គត់ផ្គង់ថាមពលដល់មជ្ឈមណ្ឌលនេះ។

មជ្ឈមណ្ឌលទិន្នន័យរបស់ក្រុមហ៊ុន Google នឹងក្លាយជាមជ្ឈមណ្ឌលដែលមានសមត្ថភាព និងទំហំវិនិយោគ ធំជាងគេនៅអាស៊ី ហើយជាផ្នែកមួយនៃការវិនិយោគពង្រីកមជ្ឈមណ្ឌលទិន្នន័យរាប់ពាន់លានដុល្លាររបស់ខ្លួននៅទូទាំងតំបន់ រួមទាំងប្រទេសសិង្ហបុរី ម៉ាឡេស៊ី និងថៃផងដែរ។

កាលពីខែមេសា ក្រុមហ៊ុន Alphabet បាននិយាយថា ខ្លួននៅតែប្ដេជ្ញាចំណាយប្រហែល ៧៥ ពាន់លានដុល្លារ នៅឆ្នាំនេះ ដើម្បីសាងសង់សមត្ថភាពមជ្ឈមណ្ឌលទិន្នន័យ បើទោះបីជាមានភាពមិនច្បាស់លាស់ផ្នែកសេដ្ឋកិច្ចដែលបណ្ដាលមកពីគោលនយោបាយពន្ធគយសកលរបស់អតីតប្រធានាធិបតីអាមេរិក លោក Donald Trump ក៏ដោយ។

ជុំវិញការវិនិយោគនេះ ក្រុមហ៊ុន Alphabet មិនបានឆ្លើយតបភ្លាមៗចំពោះសំណើសុំការអត្ថាធិប្បាយពីទីភ្នាក់ងារសារព័ត៌មាន Reuters នោះឡើយ។

លោករដ្ឋមន្ត្រីបច្ចេកវិទ្យាព័ត៌មានរដ្ឋ Andhra Pradesh លោក Nara Lokesh ដែលកំពុងស្ថិតនៅទីក្រុងសិង្ហបុរី ដើម្បីពិភាក្សាអំពីការវិនិយោគ មិនបានអត្ថាធិប្បាយលើការវិនិយោគរបស់ Google នោះទេ។ លោកបានថ្លែងថា៖ «យើងបានធ្វើសេចក្តីប្រកាសមួយចំនួន ដូចជា Sify ដែលជាសាធារណៈ» ដោយសំដៅទៅលើមជ្ឈមណ្ឌលទិន្នន័យទំហំ ៥៥០ មេហ្គាវ៉ាត់ ដែលក្រុមហ៊ុន Sify Technologies មានគម្រោងសាងសង់នៅក្នុងរដ្ឋនេះ។ លោកបានបន្តថា៖ «មានសេចក្តីប្រកាសមួយចំនួនទៀតដែលមិនទាន់ជាសាធារណៈ។ នៅខែតុលា យើងនឹងធ្វើសេចក្តីប្រកាសទាំងនោះ»៕