(បរទេស)៖ ក្រុមហ៊ុនបច្ចេកវិទ្យាយក្ស Microsoft និង Meta Platforms បានរួមចំណែកយ៉ាងធំធេងក្នុងការបង្កើនតម្លៃទីផ្សារភាគហ៊ុនបញ្ញសិប្បនិម្មិត្ត AI រហូតដល់ពាក់ ៥០០ពាន់លានដុល្លារនៅល្ងាចថ្ងៃពុធ បន្ទាប់ពីរបាយការណ៍ប្រចាំត្រីមាសរបស់ពួកគេបានបង្ហាញថា ការវិនិយោគដ៏ធំសម្បើមលើបច្ចេកវិទ្យាថ្មីនេះកំពុងផ្តល់ផលចំណេញយ៉ាងច្រើន។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី៣១ ខែកក្កដា ឆ្នាំ២០២៥។

ក្នុងការជួញដូរពង្រីក (extended trade) ភាគហ៊ុនរបស់ Microsoft បានកើនឡើង ៨% និង Meta បានកើនឡើង ៩% ដែលធ្វើឲ្យក្រុមហ៊ុនទាំងពីរនេះស្ថិតក្នុងចំណោម «Magnificent Seven» បានបង្កើនតម្លៃទីផ្សាររបស់ខ្លួនចំនួន ២៨៨ ពាន់លានដុល្លារ និង ១៥២ ពាន់លានដុល្លាររៀងគ្នា។ ជាមួយគ្នានេះក្រុមហ៊ុនផលិតឈីប AI ដ៏លេចធ្លោ Nvidia ដែលជាក្រុមហ៊ុនមានតម្លៃបំផុតនៅលើពិភពលោក ក៏បានកើនឡើង ១% ផងដែរ ខណៈដែល Amazon បានកើនឡើងជាង ២%។

គួរជម្រាបថា ការកើនឡើងនេះបានឆ្លុះបញ្ចាំងពីការប្រកួតប្រជែងរបស់ក្រុមហ៊ុនធំៗទាំងនេះក្នុងការគ្រប់គ្រងបច្ចេកវិទ្យា AI។ Meta បានព្យាករណ៍ថាប្រាក់ចំណូលប្រចាំត្រីមាសនឹងខ្ពស់ជាងការរំពឹងទុក និងបានបង្កើនការព្យាករណ៍ការចំណាយមូលធនប្រចាំឆ្នាំរបស់ខ្លួនចំនួន ២ ពាន់លានដុល្លារ ដោយសារការជំរុញដ៏ធំរបស់ខ្លួនសម្រាប់ «superintelligence» ក្នុងការប្រកួតប្រជែង AI ដ៏ក្តៅគគុក។ ចំណែកឯ Microsoft ក៏បានប្រកាសរបាយការណ៍ប្រចាំត្រីមាសដ៏អស្ចារ្យផងដែរ ដោយអាជីវកម្ម Cloud-computing Azure របស់ខ្លួនបានជំរុញប្រាក់ចំណូលឲ្យលើសពីការរំពឹងទុករបស់ Wall Street និងបានបង្ហាញពីផលចំណេញដែលកំពុងកើនឡើងពីការភ្នាល់របស់ខ្លួនលើ AI៕