(បរទេស)៖ ក្រុមហ៊ុន JD.com ដែលជាក្រុមហ៊ុនលក់រាយអនឡាញយក្សរបស់ចិន កំពុងពង្រីកខ្លួនទៅកាន់ទីផ្សារអឺរ៉ុប តាមរយៈការទិញយកក្រុមហ៊ុន Ceconomy របស់អាល្លឺម៉ង់ ដែលជាអ្នកលក់រាយឧបករណ៍អេឡិចត្រូនិចធំមួយ។ កិច្ចព្រមព្រៀងនេះមានតម្លៃ ២,២ ពាន់លានអឺរ៉ូ (ប្រហែល ២,៥ ពាន់លានដុល្លារ)។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី៣១ ខែកក្កដា ឆ្នាំ២០២៥។

ការទិញយកនេះនឹងផ្តល់ឱ្យ JD.com នូវសិទ្ធិចូលទៅកាន់បណ្តាញហាង MediaMarkt និង Saturn ប្រមាណ ១.០០០ កន្លែង នៅទូទាំងអឺរ៉ុប។ បច្ចុប្បន្ន បុគ្គលិកប្រមាណ ៥០.០០០ នាក់ កំពុងធ្វើការនៅក្នុងខ្សែសង្វាក់ទាំងពីរនេះ។ លោក Kai-Ulrich Deissner នាយកប្រតិបត្តិ (CEO) Ceconomy បានលើកឡើងថា កិច្ចព្រមព្រៀងនេះនឹងផ្តល់ឱ្យក្រុមហ៊ុនរបស់លោកនូវបច្ចេកវិទ្យា និងជំនាញលក់រាយឈានមុខគេលើពិភពលោក។

បន្ទាប់ពីការប្រកាស ភាគហ៊ុនរបស់ JD.com នៅហុងកុងបានធ្លាក់ចុះ ២,៤% ខណៈភាគហ៊ុនរបស់ Ceconomy នៅ Frankfurt បានកើនឡើង ៦,៩%។ គ្រួសារ Kellerhals ដែលជាម្ចាស់ភាគហ៊ុនធំជាងគេរបស់ Ceconomy បានយល់ព្រមលក់ភាគហ៊ុនមួយចំនួន ប៉ុន្តែនឹងបន្តរក្សាទុកភាគហ៊ុនប្រហែល ២៥,៣៥%។ ម្ចាស់ភាគហ៊ុនផ្សេងទៀតដូចជា Haniel, Beisheim, BC Equities និង Freenet ក៏មានបំណងលក់ភាគហ៊ុនរបស់ពួកគេទៅឱ្យ JD.com ផងដែរ។

លោក Deissner បានបញ្ជាក់ថា៖ «នឹងមិនមានការបញ្ឈប់បុគ្គលិកដោយបង្ខំរយៈពេលបីឆ្នាំបន្ទាប់ពីការបិទបញ្ចប់ប្រតិបត្តិការនេះទេ» ដោយបន្ថែមថា លោកមិនរំពឹងថានឹងមានបញ្ហាធំដុំណាមួយពី​អាជ្ញាធរ​ប្រឆាំង​ការ​ទុកចិត្ត​នោះ​ទេ៕