ក្រុមហ៊ុន FairDeal Cambodia សម្ពោធការិយាល័យថ្មី ក្នុងខណ្ឌសែនខុស ដើម្បីពង្រីកអាជីវកម្ម ក្នុងចែកចាយឱសថនៅកម្ពុជា

01-08-2025 09:21

(ភ្នំពេញ)៖ ក្រុមហ៊ុន FairDeal Cambodia LTD នៅថ្ងៃទី៣១ ខែកក្កដា ឆ្នាំ២០២៥នេះ បានរៀបចំកម្មវិធីសម្ពោធការិយាល័យថ្មីរបស់ខ្លួន ក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ដើម្បីពង្រីកអាជីវកម្ម ក្នុងចែកចាយឱសថនៅកម្ពុជា ក្រោមអធិបតីភាពលោក Javed Lujee អគ្គនាយកក្រុមហ៊ុន FairDeal។

កម្មវិធីសម្ពោធការិយាល័យថ្មី របស់ FairDeal Cambodia នេះ ក៏មានការចូលរួមពីលោក Sathish Kumar Ponnala ប្រធានគ្រប់គ្រងទូទៅប្រចាំក្រុមហ៊ុន FairDeal Cambodia និងថ្នាក់ដឹកនាំ រួមទាំងលោក លោកស្រី សមាជិក-សមាជិកា និងភ្ញៀវកិត្ដិយសជាច្រើនរូប។

បើតាមប្រធានផ្នែកចែកចាយ នៃក្រុមហ៊ុន FairDeal Cambodia LTD, ក្រុមហ៊ុន FairDeal Cambodia LTD ជាក្រុមហ៊ុនមួយ ចែកចាយឱសថ ពីក្រៅប្រទេសចូលមកប្រទេសកម្ពុជា និងបានបើកដំណើរ នៅក្នុងប្រទេសកម្ពុជា ប្រមាណ១៤ឆ្នាំមកហើយ។

ក្រុមហ៊ុន FairDeal Cambodia LTD មានការនាំចូលឱសថ ពីប្រទេសម៉ាឡេស៊ី, ប៉ាគីស្ថាន ឥណ្ឌា និងបណ្ដាប្រទេសជាច្រើនទៀត នៅលើជុំវិញលើពិភពលោក ដែលមានភាពល្បីល្បាយ និងមានគុណភាព ក្នុងការផលិតឱសថ ដើម្បីយកមកចែកចាយ នៅក្នុងប្រទេសកម្ពុជា។

សូមជម្រាបថា FairDeal Cambodia គឺជាក្រុមហ៊ុនចែកចាយ និងពង្រីកទីផ្សារ ដែលរីកលូតលាស់លឿនបំផុតមួយ នៅក្នុងប្រទេសកម្ពុជា សម្រាប់ផលិតផលឱសថ ការថែទាំសុខភាព និងអ្នកប្រើប្រាស់។

FAIRDEAL Cambodia មានមូលដ្ឋាននៅក្នុងប្រទេសកម្ពុជា មានការយល់ដឹងយ៉ាងស៊ីជម្រៅ អំពីលក្ខខណ្ឌទីផ្សារក្នុងស្រុក និងវិធីល្អបំផុត ដើម្បីទៅដល់អ្នកប្រើប្រាស់ រួមជាមួយនឹងផលិតផល៕