Isak ទៅហ្វឹកហាត់នៅក្លិបចាស់ Sociedad ចំពោះស្ថានភាពមិនច្បាស់លាស់ជាមួយ Newcastle
01-08-2025 09:41
(បរទេស)៖ ខ្សែប្រយុទ្ធ Alexander Isak បានកំពុងហ្វឹកហាត់ម្នាក់ឯងនៅអតីតក្លិបចាស់របស់គេគឺ Real Sociedad ជុំវិញអនាគតមិនច្បាស់លាស់នៅជាមួយ Newcastle United។

នៅចាំបានថា កីឡាករអន្តរជាតិស៊ុយអែត វ័យ ២៥ឆ្នាំរូបនេះ ធ្លាប់បានចំណាយពេល ៣ឆ្នាំផងដែរលេងឱ្យក្លិបអេស្ប៉ាញ Real Sociedad ក្នុងក្របខណ្ឌ La Liga មុនផ្លាស់មកចូលរួមជាមួយសារិកាព្រៃ Newcastle ក្នុងឆ្នាំ២០២២ ក្រោមតម្លៃខ្លួន ៦០លានផោន។
Isak បានចាកចេញពីក្រុម Newcastle ក្នុងដំណើរប្រកួតកំដៅសាច់ដុំ ត្រៀមរដូវកាលថ្មីនៅទឹកដីអាស៊ី ដោយក្លិបលេងនៅ Premier League បានបញ្ជាក់ថា រូបគេមានបញ្ហារបួសភ្លៅតិចតួច និងគាប់ជួនខ្សែប្រយុទ្ធជួរមុខរូបនេះ បានកំពុងស្វែងរកទ្រនំថ្មីផងដែរ ស្របពេលក្រុមជើងឯកលីគអង់គ្លេស Liverpool បានចាប់អារម្មណ៍ចំពោះអតីតខ្សែប្រយុទ្ធក្លិប Borussia Dortmund រូបនេះ។
គួរបញ្ជាក់ផងថា ការហ្វឹកហាត់ដាច់ដោយឡែកនៅអេស្ប៉ាញនេះ ត្រូវបានប្រភពជាច្រើនទម្លាយប្រាប់ BBC Sport ថា Isak បានប្រើប្រាស់ទីលាន និងសម្ភារៈរបស់ Sociedad ប៉ុន្តែពុំមែនហាត់ជាមួយក្រុមរបស់អេស្ប៉ាញនោះឡើយ៕