(បរទេស)៖ រដ្ឋាភិបាលចិន តាមរយៈការិយាល័យគ្រប់គ្រងអ៊ីនធឺណិត (CAC) បានហៅក្រុមហ៊ុនអាមេរិក Nvidia មកពិភាក្សាផ្ទាល់ ដោយសារមានការព្រួយបារម្ភយ៉ាងខ្លាំងពីបញ្ហាសន្តិសុខដែលអាចបង្កដោយឈីប H20 ជាឈីប AI ដែលបង្កើតឡើងជាពិសេស សម្រាប់លក់ជូនអតិថិជននៅទីផ្សារចិន ខណៈការលក់នេះ គឺក្រោមច្បាប់នៃការគ្រប់គ្រងការនាំចេញរបស់សហរដ្ឋអាមេរិក។ នេះបើតាមការចេញផ្សាយដោយសារព័ត៌មាន Reuters នៅថ្ងៃទី៣១ ខែកក្កដា ឆ្នាំ២០២៥។

CAC បានស្នើឱ្យ Nvidia ផ្ដល់ឯកសារបញ្ជាក់ច្បាស់ៗ និងទាមទារឲ្យមានការពន្យល់អំពីគ្រោះថ្នាក់ផ្នែកសន្តិសុខដូចជា៖
• សមត្ថភាពបញ្ជា​ពីចម្ងាយ (remote shutdown)
• បច្ចេកវិទ្យាគ្រប់គ្រងទីតាំង (location tracking)
• សមត្ថភាពរំខាននឹងទិន្នន័យឯកជនរបស់អ្នកប្រើប្រាស់

ការស៊ើបអង្កេតនេះត្រូវបានដាក់ចេញ បន្ទាប់ពីសហរដ្ឋអាមេរិកនៅខែមេសាកន្លងទៅបានហាមឃាតការលក់ឈីប H20 ទៅកាន់ប្រទេសចិន ហើយក្រោយមក ពោលនៅដើមខែកក្កដានេះ បានអនុញ្ញាតឲ្យបន្តនាំចេញឈីបនេះឡើងវិញ តាមរយៈការផ្តល់អាជ្ញាបណ្ណនាំចេញ និងមានលក្ខខណ្ឌ។ អំពីផ្នែកពាណិជ្ជកម្ម, Nvidia បានដាក់ការបញ្ជារទិញឈីប H20 ជាង៣០ម៉ឺនឯកតា ទៅក្រុមហ៊ុនតៃវ៉ាន់ TSMC ដើម្បីបំពេញតម្រូវការម្ដងទៀតនៅទីផ្សារចិន ដែលជាទីផ្សារធំសម្រាប់ Nvidia ប៉ុន្តែអាចបង្កគ្រោះថ្នាក់ បើរដ្ឋាភិបាលចិនដាក់ការរឹតបន្តឹងបន្ថែម។

បច្ចុប្បន្ន Nvidia មិនទាន់ឆ្លើយតបជាសាធារណៈនោះឡើយ ហើយក៏កំពុងប្រឈមមុខនឹងការស៊ើបអង្កេតរបស់ចិនផងដែរ ពាក់ព័ន្ធនឹងការទិញក្រុមហ៊ុន Mellanox នៅកន្លងមក។ ស្ថិតក្នុងបរិបទនយោបាយនិងបច្ចេកវិទ្យា, សហរដ្ឋអាមេរិក កំពុងព្យាយាមកាត់បន្ថយការចូលប្រើឈីប AI ដល់ចិន ដើម្បីទប់ស្កាត់ការចូលរួមបច្ចេកវិទ្យាទៅកាន់វិស័យយោធា។ ចិនផ្ទុយទៅវិញ ក៏កំពុងពង្រឹងការអភិវឌ្ឍឈីបក្នុងស្រុក ដូចជា Huawei, Cambricon និង Biren កំពុងវិនិយោគយ៉ាងសំខាន់ ហើយជាដៃគូប្រជែងឬជំនួសឲ្យ Nvidia៕