(ភ្នំពេញ)៖ រាជរដ្ឋាភិបាលកម្ពុជា ដឹកនាំដោយសម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានអនុញ្ញាតជាគោលការណ៍តាមសំណើររបស់ក្រសួងអប់រំ យុវជន និងកីឡា ក្នុងការទទួលសិទ្ធធ្វើម្ចាស់ផ្ទះជាផ្លូវការ នៃការប្រកួតកីឡាសាកលវិទ្យាល័យអាស៊ីអាគ្នេយ៍ លើកទី២៣ (The 23rd ASEAN University Games) ឆ្នាំ២០២៨ ខាងមុខ។

ដោយទទួលបានការអនុញ្ញាតខាងលើ កាលពីល្ងាចថ្ងៃទី៣១ ខែកក្កដាកន្លងទៅ ក្រសួងអប់រំ បានបើកកិច្ចប្រជុំពិសេសមួយ ដោយមានការចូលរួមពីមន្ដ្រីអគ្គនាយកដ្ឋានកីឡា និងអង្គភាពពាក់ព័ន្ធ ក្រោមការដឹកនាំរបស់លោក វ៉ាត់ ចំរើន និងលោក កែ ប៊ុនខៀង រដ្ឋលេខាធិការក្រសួងអប់រំ យុវជន និងកីឡា ដើម្បីពិភាក្សារៀបចំផែនការមេ និងមានលក្ខណៈគ្រប់ជ្រុងជ្រោយក្នុងការត្រៀមធ្វើម្ចាស់ផ្ទះព្រឹត្តិការណ៍កីឡានិស្សិតប្រចាំតំបន់ ២ឆ្នាំម្ដងនេះ។

លោក វ៉ាត់ ចំរើន បានគូសបញ្ជាក់ថា នេះគឺជាកិច្ចប្រជុំដំបូង ក្រោយទទួលបានការអនុញ្ញាតជាគោលការណ៍ពីរាជរដ្ឋាភិបាល ដើម្បីរៀបចំផែនការមេ ដោយត្រូវបង្កើតនូវក្រុមការងារបច្ចេកទេសពិសេសមួយ សម្រាប់ធ្វើការសិក្សាស្រាវជ្រាវឯកសារ និងបទបញ្ញាត្តិនានា ពាក់ព័ន្ធនឹងការត្រៀមរៀបចំការប្រកួតកីឡាសាកលវិទ្យាល័យអាស៊ាន ដែលដឹកនាំដោយលោក ប៉ុន សុខ អគ្គនាយកនៃអគ្គនាយកកីឡា សហការជាមួយសហព័ន្ធកីឡាសិស្ស-និស្សិតកម្ពុជា និងសហព័ន្ធកីឡាជាតិនានា។

លោកថា «យើងត្រូវរៀបចំឲ្យមានក្រុមការងារបច្ចេកទេសពិសេសមួយ ដើម្បីសិក្សាស្រាវជ្រាវឯកសារទាំងអស់ និងសិក្សានូវគោលការណ៍សំខាន់ៗ អំពីការត្រៀមរៀបចំការប្រកួតកីឡាសាកលវិទ្យាល័យអាស៊ាន ដែលជាការប្រកួតអន្ដរជាតិកម្រិតតំបន់ ១១ប្រទេស ដែលមានកីឡាខ្ទង់ពី ១៥ ទៅជាង ២០ប្រភេទកីឡា។ ទោះបីការប្រកួតនេះ មានកម្រិតមិនខ្ពស់ដូចស៊ីហ្គេម តែក្នុងនាមម្ចាស់ផ្ទះ យើងត្រូវធ្វើយ៉ាងណាឲ្យមានរបៀបធ្វើការច្បាស់លាស់ ត្រឹមត្រូវ ពិសេសរក្សាបាននូវកិត្តិយស និងកេរ្ដិ៍ឈ្មោះរបស់យើង ដែលធ្លាប់ធ្វើបានជោគជ័យក្នុងកីឡាស៊ីហ្គេម ឆ្នាំ២០២៣»។

ទន្ទឹមជាមួយការទទួលធ្វើម្ចាស់ផ្ទះព្រឹត្តិការណ៍កីឡានិស្សិតកម្រិតំបន់នេះដែរ ក្រោមការដឹកនាំរបស់រាជរដ្ឋាភិបាល ក៏ដូចជាការយកចិត្តទុកដាក់ និងប្រកបដោយចក្ខុវិស័យរបស់ថ្នាក់ដឹកនាំក្រសួងអប់រំ ក្នុងនាមមន្ដ្រីទទួលបន្ទុល លោក វ៉ាត់ ចំរើន បានប្ដេជ្ញានឹងធ្វើការងារនេះជាមួយគ្រប់ភាគីពាក់ព័ន្ធ ដើម្បីធានាបាននូវការត្រៀមលក្ខណៈមុនឲ្យបានគ្រប់ជ្រុងជ្រោយ ដ្បិតការប្រកួតនេះ ក៏ជាជំនួយមួយ ក្នុងការសាកល្បងសម្រាប់កម្ពុជាត្រៀមឆ្ពោះទៅធ្វើម្ចាស់ផ្ទះការប្រកួតកីឡាយុវជនអាស៊ី លើកទី៤ នាឆ្នាំ២០២៩ ផងដែរ។

ដូច្នេះក្រោយពីអនុម័តបង្កើតក្រុមការងារបច្ចេកទេសពិសេស និងដាក់ចេញនូវផែនការមេរួចរាល់ ក្រុមការងារពាក់ព័ន្ធទាំងអស់ នឹងចាប់ផ្ដើមធ្វើការងារតាមប្រតិទិនការងារនីមួយៗឲ្យបានហ្មត់ចត់ ក៏ដូចជាការពិនិត្យលើគ្រប់ទិដ្ឋភាព និងរចនាសម្ព័ន្ធពាក់ព័ន្ធផ្សេងៗ ព្រមទាំងការកំណត់កាលបរិច្ឆេទសម្រាប់រៀបចំការប្រកួត និងកីឡាកំណត់ប្រភេទកីឡាជាដើម តាមរយៈកិច្ចប្រជុំជាបន្ដបន្ទាប់ សម្រាប់ធ្វើរបាយការណ៍ជូនថ្នាក់ដឹកនាំសម្រេច និងអនុម័តនាពេលខាងមុខ។

គួរដឹងថា មុនដល់វេនកម្ពុជាធ្វើម្ចាស់ផ្ទះការប្រកួតកីឡាក្របខណ្ឌនិស្សិតខាងលើ ម៉ាឡេស៊ី នឹងធ្វើម្ចាស់ផ្ទះព្រឹត្តិការណ៍កីឡាសាកលវិទ្យាល័យអាស៊ីអាគ្នេយ៍ លើកទី២២ នាឆ្នាំ២០២៦ ខាងមុខ បន្ទាប់ពីព្រឹត្តិការណ៍លើកទី២១ បានប្រព្រឹត្តទៅនៅប្រទេសឥណ្ឌូនេស៊ី កាលពីឆ្នាំ២០២៤ កន្លងទៅ៕