ខ្សែប្រយុទ្ធ Aubameyang វិលមកចូលរួមជាមួយ Marseille វិញ ក្រោយចាកចេញបានតែ ១ឆ្នាំ

01-08-2025 10:11

(ម៉ាកសី)៖ កីឡាករសញ្ជាតិកាបុង Pierre-Emerick Aubameyang បានវិលមកលេងជាមួយក្លិបចាស់ Marseille វិញ ក្រោយឃ្លាតឆ្ងាយបានតែ ១ឆ្នាំប៉ុណ្ណោះ។ នេះបើយោងតាមការចញផ្សាយដោយ BBC។

Aubameyang វ័យ ៣៦ឆ្នាំដែលធ្លាប់ឈ្នះពាន FA Cup ជាមួយកាំភ្លើងធំ Arsenal នារដូវកាល ២០១៩-២០ បានវិលត្រឡប់មកចូលរួមជាមួយក្រុមនៅ Ligue 1 វិញដោយគ្មានតម្លៃផ្ទេរ បន្ទាប់ពីចប់កិច្ចសន្យាជាមួយក្លិប Al-Qadsiah នៃក្របខណ្ឌ Saudi Pro League។

ខ្សែប្រយុទ្ធរូបនេះត្រូវបានគេរាយការណ៍មកថា នឹងព្រមព្រៀងចុះកិច្ចសន្យាលេងឱ្យ Marseille ជាលើកទី២ នេះរហូតដល់ឆ្នាំ២០២៧ ដែលវាជាការផ្ទេរលើកទី៥ របស់គេផងដែរ គិតចាប់តាំងពីចាកចេញពី Arsenal នាអំឡុងខែកុម្ភៈ ឆ្នាំ២០២២ មក។

អតីតខ្សែប្រយុទ្ធក្លិប Borussia Dortmund របស់អាល្លឺម៉ង់មួយនេះ ធ្លាប់បានចំណាយពេលលេង ៦ខែផងដែរក្នុងក្លិបអេស្ប៉ាញ FC Barcelona មុនពេលត្រឡប់មកកាន់ Premier League វិញក្នុងក្លិបតោខៀវ Chelsea នារដូវកាល ២០២២-២៣៕