(ភ្នំពេញ)៖ ការ៉េមួយ គឺជាកម្មវិធីប្រចាំឆ្នាំដ៏មានកិត្តិយស ដែលមានបំណងចីរភាពក្នុងការថែរក្សា និងផ្ដល់អំណាចដល់អ្នកសរសេរភាពយន្ដវ័យក្មេងនៅកម្ពុជា និងក្នុងតំបន់អាស៊ាន ដែលបានរៀបចំថ្ងៃបង្ហាញគម្រោង សម្រាប់កម្មវិធីផលិតភាពយន្ដខ្លីឆ្នាំ ២០២៥ កាលពីថ្ងៃអាទិត្យ ទី២៧ ខែកក្កដា នៅឯរោងភាពយន្ត លេជេន អូឡាំព្យា។ សិក្ខាសាលា និងព្រឹត្តិការណ៍ផ្សេងៗដែលរៀបចំដោយផលិតកម្ម Kongchak Pictures និង Anti-Archive បានបង្ហាញពីសិល្បៈច្នៃប្រឌិតរបស់សំឡេងថ្មីៗក្នុងវិស័យភាពយន្ដ ដោយផ្ដល់ឱកាសអភិវឌ្ឍដ៏មានតម្លៃ ការបណ្ដុះបណ្ដាលពីអ្នកជំនាញ និងវេទិកាដើម្បីបង្ហាញគម្រោងរបស់ពួកគេ ជូនជាផ្លូវការដល់អ្នកជំនាញក្នុងឧស្សាហកម្មនេះ។

កម្មវិធីលើកនេះទាក់ទាញការចូលរួម បានជាងពីរដងប្រៀបធៀបទៅនឹងឆ្នាំមុន ដែលបង្ហាញពីការចាប់អារម្មណ៍ និងការគាំទ្រកាន់តែខ្លាំងក្នុងសហគមន៍សិល្បៈ ចំពោះអ្នកធ្វើភាពយន្ដវ័យក្មេង។ កម្មវិធីរយៈពេលមួយសប្តាហ៍នេះ បានបញ្ចប់ជាមួយថ្ងៃបង្ហាញគម្រោងដ៏គួរឱ្យរំភើប ដែលមានអ្នកចូលរួមបង្ហាញគម្រោងភាពយន្ដខ្លីរបស់ពួកគេ ចំពោះគណៈកម្មការកិត្តិយស និងទស្សនិកជនដែលចូលរួម។

មុនព្រឹត្តិការណ៍ចុងក្រោយ ក្រុមអ្នកចូលរួមក្នុងកម្មវិធី ការ៉េមួយ ឆ្នាំ២០២៥ បានចូលរួមសិក្ខាសាលារយៈពេល ៦ថ្ងៃ ដែលរចនាឡើងដើម្បីផ្ដល់ជំនាញសំខាន់ៗ និងចំណេះដឹងក្នុងវិស័យឧស្សាហកម្មនេះ សម្រាប់អ្នកធ្វើភាពយន្ដវ័យក្មេង។ នៅក្នុងកម្មវិធីពួកគេបានទទួលការបណ្តុះបណ្តាលពីអ្នកជំនាញ និងអ្នកផលិតភាពយន្ដឆ្នើមមួយចំនួនរួមមាន លោក ឡូយ តែ, លោក Daniel Mattes, កញ្ញា មាស ស្រីលីន, លោក Weijie Lai និងលោក Raymond Phathanavirangoon។

នេះជាលើកដំបូងដែលកម្មវិធីការ៉េមួយ បានស្វាគមន៍គម្រោងដែលមកពីប្រទេស ក្នុងតំបន់អាស៊ានចូលរួមក្នុងកម្មវិធី ដើម្បីបង្ហាញពីការប្តេជ្ញាចិត្តក្នុងការភ្ជាប់សហគមន៍សិល្បៈនៅទូទាំងតំបន់។ ពួកគេជឿថា ការលើកទឹកចិត្តឱ្យផលិតករវ័យក្មេងចាប់ផ្ដើមភ្ជាប់ទំនាក់ទំនងគ្នា និងសហការគ្នា គឺមានសារៈសំខាន់ណាស់។ ការចូលរួមឆ្លងព្រំដែននេះ បានជួយពង្រីកទស្សនវិស័យរបស់អ្នកចូលរួម ដោយណែនាំពួកគេអំពីស្ថានភាព និងឱកាសនៃការផលិតភាពយន្តខ្នាតពិភពលោក។ តាមរយៈការថែរក្សាទំនាក់ទំនងទាំងនេះ ពួកគេសង្ឃឹមថា នឹងបង្កើនសមត្ថភាព ដល់ផលិតករដែលមានទេពកោសល្យឱ្យមានគំនិតទូលាយ និងរួមចំណែកដល់ឧស្សាហកម្មភាពយន្ត ដែលមានទំនាក់ទំនងគ្នាទៅវិញទៅមកដ៏រស់រវើក។

គណៈកម្មការវាយតម្លៃ ដែលមានលោកស្រី Lorna Tee កញ្ញា Danech San និងលោក Eric Tsang បានផ្ដល់មតិយោបល់សួរសំណួរ និងការយកចិត្តទុកដាក់ក្នុងអំឡុងព្រឹត្តិការណ៍ ដើម្បីគាំទ្រដល់ការរីកចម្រើនផ្នែកសិល្បៈ និងវិជ្ជាជីវៈរបស់អ្នកចូលរួម។

អ្នកឈ្នះរង្វាន់៖
រង្វាន់ទី១ ពីគណៈកម្មការវាយតម្លៃ ($2,000): Long Hair and A Washed Floral Skirt ដោយ Daphne និង Dimitri Hariastuti។
រង្វាន់ទី២ ពីគណៈកម្មការវាយតម្លៃ ($1,500): Be Not Afraid ដោយ Zack Le និង Mai Xuan Yen Huynh។
រង្វាន់ទី៣ ពីគណៈកម្មការវាយតម្លៃ ($1,000): The Wind Between Us ដោយ Seakleng Song និង Somalin Chheang។
រង្វាន់ចំណាំពិសេសពីគណៈកម្មការវាយតម្លៃ: Mata-Mata ដោយ Carlos Antonio Sison និង Franz Louie Domasian។
រង្វាន់ឧបត្ថម្ភពី Sony Cambodia៖
Paranoya ដោយ Hemkiry Song និង Aulissa Ty។
Seda ដោយ Jean-Baptiste Phou និង Deka Nine។
រង្វាន់ពី Legend Cinema ($750): Kouly Komnen ដោយ Jasonphearyuth Yon និង Colin Tie។
រង្វាន់ពី Major Cineplex ($750): Paranoya ដោយ Hemkiry Song និង Aulissa Ty។
រង្វាន់របស់ទស្សនិកជន ($500): Paranoya ដោយ Hemkiry Song និង Aulissa Ty។
រង្វាន់ Platform Busan Award: Paranoya ដោយ Hemkiry Song និង Aulissa Ty។

កម្មវិធី ការ៉េមួយ ឆ្នាំ២០២៥ សូមថ្លែងអំណរគុណយ៉ាងជ្រាលជ្រៅចំពោះបុគ្គល និងអង្គការទាំងឡាយ ដែលបានរួមចំណែកធ្វើឱ្យព្រឹត្តិការណ៍នេះអាចប្រព្រឹត្តិទៅបាន។ សូមអរគុណជាពិសេសចំពោះលោក ឯក ប៊ុនថា អនុរដ្ឋលេខាធិការ ដែលតំណាងក្រសួងវប្បធម៌ និងវិចិត្រសិល្បៈ និងលោក ប៉ាក់ សុខុម រដ្ឋលេខាធិការ ដែលតំណាងក្រសួងទេសចរណ៍ ចំពោះការគាំទ្រដ៏មានតម្លៃ និងការមានវត្តមានដ៏ខ្ពង់ខ្ពស់។

សូមថ្លែងអំណរគុណយ៉ាងជ្រាលជ្រៅ ចំពោះអ្នកឧបត្ថម្ភ និងដៃគូទាំងឡាយរួមមាន នាយកដ្ឋានភាពយន្តកម្ពុជា, ស្ថានទូតបារាំងប្រចាំកម្ពុជា, វិទ្យាស្ថានបារាំង (L’Institut Français), Jakarta Film Week, Quezon City Film Commission, Asian Film Alliance Network, Platform Busan, Westec Media Limited, Major Cineplex, M Pictures, ទឹកសុទ្ធ Vital Premium Water, មីជាតិ, សាកលវិទ្យាល័យ Western, ST Market, Sony Cambodia, សណ្ឋាគារ Sarina Boutique, MyCam និងដៃគូទទួលបន្ទុករោងភាពយន្ត Legend Cinema។ ការសហការ និងការគាំទ្ររបស់ពួកគេ គឺជាចំណែកសំខាន់ក្នុងការធ្វើឱ្យកម្មវិធី ការ៉េមួយ ឆ្នាំ២០២៥ ប្រព្រឹត្តទៅបានដោយជោគជ័យ៕