(ភ្នំពេញ)៖ ក្លិបព្រះខ័នរាជស្វាយរៀង បានសម្រេចនាំចូលខ្សែការពារអន្ដរជាតិ ១រូបទៀត គឺកីឡាករ Faris Hammouti អតីតជម្រើសជាតិ U20 ម៉ារ៉ុកមកពង្រឹងក្រុមត្រៀមប្រជែងជើងឯកក្លិបបាល់ទាត់អាស៊ីអាគ្នយ៍ (ASEAN Club Championship Shopee Cup) និងជើងឯកក្លិបបាល់ទាត់កម្រិតទី៣ ទ្វីបអាស៊ី (AFC Challenge League) ឆ្នាំ២០២៥/២៦ ខាងមុខ។

ការបង្ហាញកីឡាករបរទេសថ្មីនេះ បានធ្វើឲ្យអ្នកគាំទ្រមានការចាប់អារម្មណ៍ជាខ្លាំង ដ្បិតព្រះខ័នរាជស្វាយរៀង មានកីឡាករបរទេស ៦រូបរួចហើយ សម្រាប់កូតាកីឡាករបរទេសត្រៀមការពារជើងឯកលីគកំពូលកម្ពុជា រដូវកាលថ្មី រួមមានខ្សែប្រយុទ្ធប្រេស៊ីល Patrick, ខ្សែប្រយុទ្ធហ្គាណា Peprah Kwame, ខ្សែការពារជប៉ុន Odawara Takashi, ខ្សែប្រយុទ្ធប្រេស៊ីល Cristian Roque, ខ្សែបម្រើជប៉ុន Ryo Fujii និងខ្សែបម្រើ-ប្រយុទ្ធឡាវ Boungphachan Boungkong។

សម្រាប់កីឡាករចំណូលថ្មី Hammouti វិញ ត្រូវបានក្លិបបញ្ជាក់ថា ជាការនាំចូលសម្រាប់លេងពាន ASEAN Club Championship Shopee Cup 2025/26 និងពានរង្វាន់ AFC Challenge League 2025/26 ប៉ុណ្ណោះ ។ រីឯការប្រកួតលីគកំពូលកម្ពុជា ក៏ដូចជាពានរង្វាន់សម្ដេចអគ្គមហាសេនាបតីតេជោ ហ៊ុន សែន រូបគេមិនត្រូវបានចុះឈ្មោះលេងឡើយ។

គួរដឹងថា ខ្សែការពារកណ្ដាល Hammouti មានបទពិសោធន៍ជោគជ័យលេងនៅលីគហូឡង់ ខណៈមុនផ្ទេរមកក្លិបព្រះខ័នរាជស្វាយរៀង គេបានលេងឲ្យក្លិប FC Emmen នៃលីគទី២ ហូឡង់ ។ កីឡាករវ័យ ២៨ឆ្នាំរូបនេះ បញ្ជាក់ថា ការសម្រេចចិត្តមកប្រកបអាជីពនៅកម្ពុជា ដោយសារខ្លួនមើលឃើញកីឡាករហូឡង់ជាច្រើន បានចាប់អារម្មណ៍ និងជោគជ័យពេលមកលេងនៅទីនេះ ហើយខ្លួនក៏សង្ឃឹមថា នឹងអាចឈ្នះពានជាមួយក្លិបមានមូលដ្ឋាននៅខេត្តស្វាយរៀងនេះផងដែរ៕