(បរទេស)៖ នៅក្នុងសន្និសីទប្រចាំត្រីមាសទី៣ ឆ្នាំ២០២៥ ដែលធ្វើឡើងនៅថ្ងៃព្រហស្បត្តិ៍សប្តាហ៍នេះ លោក Tim Cook នាយកប្រតិបត្តិក្រុមហ៊ុន Apple បាននិយាយថា Apple រួចរាល់ក្នុងការចំណាយប្រាក់យ៉ាងច្រើនរបស់ខ្លួន ដើម្បីចូលរួមប្រកួតប្រជែងក្នុងវិស័យបញ្ញាសិប្បនិម្មិត។ Apple គ្រោងនឹងវិនិយោគបន្ថែមក្នុង មណ្ឌលទិន្នន័យ (data centers) និងសេវាផ្គត់ផ្គង់កម្លាំង AI ដើម្បីជួយបង្កើតសេវាថ្មីៗ។ នេះបើតាមការចេញផ្សាយដោយសារព័ត៌មាន Reuters នៅថ្ងៃទី០១ ខែសីហា ឆ្នាំ២០២៥។

លោក Tim Cook បាននិយាយថា «យើងមិនស្ទាក់ស្ទើរនៅពេលមានឱកាស ដែលអាចផ្ដល់អត្ថប្រយោជន៍យ៉ាងច្បាស់លាស់នោះឡើយ»។ ប្រភពបានបង្ហាញថា Apple បានទិញក្រុមហ៊ុនបច្ចេកវិទ្យា AI ចំនួន ៧ ក្រុមហ៊ុន នៅក្នុងឆ្នាំ២០២៥នេះ ហើយអាចនឹងមានកិច្ចព្រមព្រៀងទិញក្រុមហ៊ុនធំៗបន្ថែមនៅពេលអនាគត ដូចជា Perplexity ។ នៅពេលដែលក្រុមហ៊ុន Google និង Microsoft ចំណាយលើ AI ច្រើនបំផុត ពោលគឺជាង១០០ពាន់លានដុល្លារក្នុងមួយឆ្នាំនោះ ងាកមក Apple វិញ កំពុងធ្វើការប្រែប្រួលគោលនយោបាយ ដើម្បីប្រជែងឲ្យទាន់ក្រុមហ៊ុនទាំងនោះ។

គោលបំណងរបស់ Apple គឺនឹងបញ្ចេញប្រព័ន្ធ Apple Intelligence ដែលមានមុខងារ ដូចជា៖
* ការបកប្រែភាសាភ្លាមៗ
* ជំនួយសរសេរឯកសារ
* ការណែនាំហាត់ប្រាណ
* និង Siri ជំនាន់ថ្មី (ដែលអាចនឹងអាចប្រើបាននៅឆ្នាំ ២០២៦)៕