(ភ្នំពេញ)៖ ក្រុមហ៊ុន ធីអេច អូតូម៉ូជីវ មេនូហ្វេកឆឺរីង ឯ.ក និងក្រុមហ៊ុន ចេណីរល ម៉ូទ័រ នៅថ្ងៃទី០១ ខែសីហា ឆ្នាំ២០២៥នេះ បានចុះហត្ថលេខាផ្តល់សិទ្ធិផ្តាច់មុខតម្លើងរថយន្ត ហ្សេវរ៉ូឡេ នៅកម្ពុជា ដែលពិធីនេះបានធ្វើឡើងនៅអគារតាំងបង្ហាញរថយន្ត Chevrolet ដោយមានការចូលរួមពីសំណាក់លោកស្រី Bridgette L. Walker ភារធារីស្ថានទូតសហរដ្ឋអាមេរិកកម្ពុជា និងលោក Hector នាយកប្រតិបត្តិជាន់ខ្ពស់របស់ក្រុមហ៊ុន General Motors និង តំណាងក្រុមហ៊ុន យូណាយធីត អូតូ ត្រេឌីង ព្រមទាំងភ្ញៀវ កិត្តិយសដៃគូសហការ និងសមាជិកសារព័ត៌មានមកពីគ្រប់ស្ថាប័ន។

ពិធីចុះហត្ថលេខានេះបានបើកផ្លូវដល់ក្រុមហ៊ុន ក្រុមហ៊ុន យូណាយធីត អូតូ ត្រេឌីង ក្នុងការសាងសង់រោងចក្រតម្លើងរថយន្តទំនើប ការផ្តល់សេវាកម្មកាន់តែប្រសើរ ព្រមទាំងជួយជម្រុញដល់ការផលិត និងចែកចាយនៅក្នុងតំបន់កាន់តែរីកចម្រើននាពេលអនាគត។

លោក Hector ដែលជាប្រធាន និងនាយកគ្រប់គ្រងនៃក្រុមហ៊ុន GM Asia បានសម្តែងការសាទរចំពោះកិច្ចសហការនេះថា ភាពជាដៃគូរវាងក្រុមហ៊ុន United Auto Trading និង General Motors គឺជាព្រឹត្តិការណ៍ដ៏សំខាន់មួយក្នុងតំបន់អាស៊ីអាគ្នេយ៍ ដែលកម្ពុជាបានផ្តល់នូវទីតាំងយុទ្ធសាស្ត្រដ៏សំខាន់ កម្លាំងពលកម្មនិងជំនាញ និងជួយជំរុញដល់ការរីកចម្រើនហេដ្ឋារចនាសម្ព័ន្ធឧស្សាហកម្ម ហើយយើងនឹងនៅទីនេះគាំទ្រដល់ក្រុមហ៊ុនយូណាយធីត អូតូ ត្រេឌីង ដើម្បីពង្រឹង សមត្ថភាព និងបន្តរីកចម្រើនលើវិស័យយានយន្តនៅកម្ពុជា ។

ឆ្លុះបញ្ចាំងពីមនោសញ្ចេតនាដ៏មុះមុតនេះ លោក ណម ហាវ នាយកគ្រប់គ្រងក្រុមហ៊ុន យូណាយធីត អូតូ ត្រេឌីង បានថ្លែងថា ការយកចិត្តទុកដាក់ និងការប្តេជ្ញាចិត្តជាច្រើនឆ្នាំកន្លងមករបស់យើង បានទទួលការជឿទុកចិត្តពីក្រុមហ៊ុន General Motors ។ យើងពិតជាមានមោទនភាពដែលបានទទួលអាជ្ញាប័ណ្ណក្នុងការផលិតរថយន្ត Chevrolet ដែលជា ម៉ាកយីហោឈានមុខគេលើពិភពលោក នៅក្នុងរោងចក្ររបស់យើង។ គម្រោងនេះមិនត្រឹមតែឆ្លុះបញ្ចាំងពីការប្តេជ្ញាចិត្តរួម គ្នារបស់យើងចំពោះគុណភាព និងឧត្តមភាពប៉ុណ្ណោះទេ ប៉ុន្តែថែមទាំងរួមចំណែកដល់ការអភិវឌ្ឍន៍សេដ្ឋកិច្ច និង កំណើនឧស្សាហកម្មរបស់ប្រទេសកម្ពុជាផងដែរ។

ដោយឃើញកំណើននៃសេដ្ឋកិច្ចជាតិកើនឡើងពីមួយឆ្នាំទៅមួយឆ្នាំ ព្រមទាំងចក្ខុវិស័យរបស់រាជរដ្ឋាភិបាលកម្ពុជាសម្រាប់ឆ្នាំ២០៣០ ដែលផ្តោតលើការអភិវឌ្ឍសេដ្ឋកិច្ចប្រកបដោយចីរភាព និងការទាក់ទាញវិនិយោគបរទេស បានធ្វើឲ្យក្រុមហ៊ុន ធីអេច អូតូម៉ូជីវ មេនូហ្វេកឆឹរឹង ឯ.ក មានជំនឿចិត្តខ្ពស់ក្នុងការវិ និយោគនៅក្នុងវិស័យឧស្សាហកម្មយានយន្តនៅកម្ពុជា។ ការវិនិយោគនេះក្នុងទំហំទឹកប្រាក់សរុបចំនួន ១៩លានដុល្លារអាមេរិក ដើម្បីដំណើរការរោងចក្រ តម្លើងរថយន្ត ដែលអាចផលិតឡានចន្លោះពី ១ម៉ឺន ដល់ ១ម៉ឺន ៥ពាន់គ្រឿង ក្នុងរយៈ ពេល១ឆ្នាំ។

បន្ថែមលើសមត្ថភាពផលិតនេះរោងចក្ររបស់ ក្រុមហ៊ុន ធីអេច អូតូម៉ូជីវ មេនូហ្វេកឆឹធឺរីង ឯ.ក ក៏បានផ្តល់ឱកាសការងារដល់ពលកម្មជាតិចំនួនចាប់ពី ៤០០នាក់ឡើងដល់ ៦០០នាក់ ជាផ្នែកមួយនៃការចូលរួមអភិវឌ្ឍសេដ្ឋកិច្ចជាតិ និង ជួយកាត់បន្ថយអត្រានិកម្មភាពនៅកម្ពុជា។ រោងចក្ររបស់ក្រុមហ៊ុន យូណាយធីត អូតូ ត្រេឌីង នឹងផ្តោតលើការដំឡើងរថយន្តម៉ាក Chevrolet អោយស្របតាមទី ផ្សារក្នុងស្រុក និងក្នុងតំបន់ ដោយផ្តោតលើគុណភាព សុវត្ថិភាព និងនិរន្តរភាព ហើយកិច្ចសហការនេះក៏រំពឹងយ៉ាង មុតមាំថាអាចបង្កើតឱកាសការងារថ្មីៗ លើកកម្ពស់សមត្ថភាពប្រជាជនក្នុងស្រុក និងអាចធ្វើឱ្យប្រទេសកម្ពុជាឈានជា ដៃគូប្រកួតប្រជែងក្នុងខ្សែសង្វាក់ផ្គត់ផ្គង់រថយន្តនៅក្នុងពិភពលោក។

សូមបញ្ជាក់ថា ក្រុមហ៊ុន General Motors គឺជាក្រុមហ៊ុនរថយន្តសកលមួយដែលបានប្តេជ្ញាចិត្តក្នុងការផ្តល់ជូននូវដំណោះស្រាយក្នុង ការដឹកជញ្ជូនប្រកបដោយសុវត្ថិភាព និរន្តរភាព និងប្រកបដោយភាពច្នៃប្រឌិត។ ជាមួយនឹងប្រតិបត្តិការនៅក្នុងប្រទេសជាង១០០ ចក្ខុវិស័យរបស់ក្រុមហ៊ុន GM គឺចង់បង្កើតពិភពលោកមួយដោយគ្មានហានិភ័យនៃគ្រោះថ្នាក់ចរាចរណ៍ គ្មានការបំភាយឧស្ម័នពុល និងកាត់បន្ថយការកកស្ទះចរាចរណ៍ជាមួយនឹងការបំពាក់បច្ចេកវិទ្យាឆ្លាតវៃ។

អំពីក្រុមហ៊ុន United Auto Trading Co., Ltd.៖ ក្រុមហ៊ុន United Auto Trading Co., Ltd. គឺជាក្រុមហ៊ុនចែកចាយលក់ចេញ-នាំចូលរថយន្តឈានមុខគេក្នុងប្រទេសកម្ពុជា ជាមួយនឹងបេសកកម្មក្នុងការនាំយកយានយន្ត និងសេវាកម្មលំដាប់ពិភពលោកមកជូនអ្នកប្រើប្រាស់នៅកម្ពុជា និងរួមចំណែកដល់វឌ្ឍនភាពឧស្សាហកម្ម និងសេដ្ឋកិច្ចរបស់ប្រទេស៕