គណៈកម្មការអឺរ៉ុបថា ការយកថ្លៃបណ្តាញសេវាពីក្រុមហ៊ុនបច្ចេកវិទ្យាធំៗមិនមែនជាដំណោះស្រាយទេ

01-08-2025 16:42

(បរទេស)៖ គណៈកម្មការអឺរ៉ុបបានបញ្ជាក់ថា ខ្លួនមិនយល់ស្របនឹងការយកថ្លៃបណ្ដាញសេវាពីក្រុមហ៊ុនបច្ចេកវិទ្យាធំៗ ដើម្បីរ៉ាប់រងលើការអភិវឌ្ឍប្រព័ន្ធ 5G និងអ៊ីនធឺណិតល្បឿនលឿននោះទេ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី០១ ខែសីហា ឆ្នាំ២០២៥។

បញ្ហានេះបានបង្កឱ្យមានភាពតានតឹងរវាងក្រុមហ៊ុនទូរគមនាគមន៍នៅអឺរ៉ុបដូចជា Deutsche Telekom, Orange, Telefonica, និង Telecom Italia ដែលចង់ឱ្យក្រុមហ៊ុនបច្ចេកវិទ្យាយក្សដូចជា Google, Meta, និង Netflix រួមចំណែកក្នុងថ្លៃចំណាយនេះ ព្រោះក្រុមហ៊ុនទាំងនេះបានប្រើប្រាស់ទិន្នន័យអ៊ីនធឺណិតច្រើនជាងគេ។ ពួកគេហៅវាថាជា «ការចែករំលែកថ្លៃឈ្នួលដោយយុត្តិធម៌»។ ផ្ទុយទៅវិញ ក្រុមហ៊ុនបច្ចេកវិទ្យាបានចាត់ទុកសំណើនេះថាជា «ពន្ធអ៊ីនធឺណិត»

អ្នកនាំពាក្យគណៈកម្មការអឺរ៉ុប លោក Thomas Regnier បានថ្លែងនៅថ្ងៃព្រហស្បតិ៍សប្តាហ៍នេះថា ការយកថ្លៃបណ្ដាញមិនមែនជាដំណោះស្រាយដ៏ល្អនោះទេ ហើយសហភាពអឺរ៉ុបមានសិទ្ធិអធិបតេយ្យភាពក្នុងការបង្កើតច្បាប់លើបញ្ហានេះ។ ​លោកក៏បានបន្ថែមថា សេចក្តីថ្លែងការណ៍របស់សេតវិមានដែលថា សហភាពអឺរ៉ុបនឹងមិនយកថ្លៃនេះ គឺមិនអនុវត្តចំពោះតែក្រុមហ៊ុនអាមេរិកនោះទេ ប៉ុន្តែវាអនុវត្តចំពោះក្រុមហ៊ុនទាំងអស់។

គួរជម្រាបថា គណៈកម្មការអឺរ៉ុបគ្រោងនឹងចេញសំណើច្បាប់ថ្មីមួយដែលមានឈ្មោះថា «Digital Networks Act» នៅខែវិច្ឆិកាខាងមុខនេះ ដើម្បីជំរុញការអភិវឌ្ឍហេដ្ឋារចនាសម្ព័ន្ធឌីជីថលទូទាំងទ្វីបអឺរ៉ុប៕