ខ្មែរជួយខ្មែរ! ថ្នាក់ដឹកនាំ និងក្រុមការងារ «MASTER SUKI SOUP» ចុះចែកស្បៀង និងសម្ភារៈចាំបាច់មួយចំនួន ជូនទៅដល់វីរជនកងទ័ពជួរមុខ និងជនភៀសសឹកក្នុងខេត្តសៀមរាប

01-08-2025 16:44

(សៀមរាប)៖ ក្នុងស្មារតីខ្មែរជួយខ្មែរ! ថ្នាក់ដឹកនាំ និងក្រុមការងារហាង MASTER SUKI SOUP បានធ្វើសកម្មភាពចុះចែកជូនស្បៀង និងសម្ភារៈចាំបាច់មួយចំនួន ជូនទៅដល់វីរជនជួរមុខ និងជនភៀសសឹកនៅក្នុងស្រុកបាគង ខេត្តសៀមរាប កាលពីថ្ងៃទី៣០ ខែកក្កដា ឆ្នាំ២០២៥។

ទន្ទឹមនឹងនេះថ្នាក់ដឹកនាំហាង MASTER SUKI SOUP ក៏សូមអរគុណទៅដល់សប្បុរសជន ដែលចូលរួមបរិច្ចាគថវិកា ក៏ដូចជាស្បៀង និងសម្ភារៈផ្សេងៗនៅក្នុងកម្មវិធីសប្បុរសធម៌នេះ ដើម្បីបង្ហាញពីស្មារតីខ្មែរជួយខ្មែរ ជាពិសេសឆ្លើយតបទៅនឹងផលប៉ះពាល់ និងតម្រូវការជាចាំបាច់របស់ប្រជាជនកម្ពុជា ពីជម្លោះព្រំដែនកម្ពុជា-ថៃ។ យើងទាំងអស់សូមគោរពចំពោះវីវភាព និងការលះបង់របស់កងកម្លាំងជួរមុខ ព្រមទាំងក្រុមគ្រួសារ ដែលបានឈរជើងយ៉ាងរឹងមាំ ដើម្បីការពារទឹកដីប្រទេសកម្ពុជា។

សម្ភារៈចាំបាច់មួយចំនួន និងស្បៀងអាហារសំខាន់ៗទាំងអស់នេះ គឺដើម្បីបំពេញនូវតម្រូវការផ្នែកអាហារ និងការស្នាក់នៅរបស់បងប្អូនខ្មែរក្នុងគ្រាលំបាក ហើយជាការឆ្លើយតបនឹងតម្រូវការបន្ទាន់នេះ MASTER SUKI SOUP ក៏បានកៀរគរបុគ្គលិកស្ម័គ្រចិត្ត និងសប្បុរសជននានា ដើម្បីទិញទំនិញ វេចខ្ចប់ និងដឹកជញ្ជូនកញ្ចប់សម្ភារៈទាំងនេះ ទៅដល់តំបន់ដែលមានតម្រូវការចាំបាច់បំផុត៕